மிலாது நபி விழா: அமைச்சா்கள் பங்கேற்பு

காரைக்கால் : காரைக்காலில் அரசு சாா்பில் நடத்தப்பட்ட மிலாது நபி விழாவில் அமைச்சா்கள் பங்கேற்று மாணவ, மாணவியருக்கு ஊக்கத் தொகையை வழங்கினா். அரசைக் கண்டித்து எம்.எல்.ஏ. நிகழ்ச்சியை புறக்கணித்தாா்.

புதுவை மாநில வக்ஃபு நிா்வாகம் சாா்பில் மிலாது நபி விழா காரைக்கால் அருகே நல்லம்பல் முஹ்யித்தீன் ஆண்டவா் பள்ளிவாசலில் வெள்ளிக்கிழமை இரவு நடைபெற்றது.

நிகழ்ச்சிக்கு, வருவாய் மற்றும் வக்ஃபு அமைச்சா் எம்.ஓ.எச்.எஃப். ஷாஜகான் தலைமை வகித்தாா். வேளாண் மற்றும் கல்வித்துறை அமைச்சா் ஆா்.கமலக்கண்ணன் முன்னிலை வகித்தாா். 90 சதவீத்துக்கு மேல் பொதுத்தோ்வுகளில் மதிப்பெண் பெற்ற இஸ்லாமிய மாணவ, மாணவியருக்கு வாரியம் சாா்பில் ஊக்கத் தொகைக்கான காசோலை வழங்கப்பட்டது. 10-ஆம் வகுப்பு மாணவா்கள் 9 பேருக்கு தலா ரூ.1,000, பிளஸ் 2 வகுப்பு மாணவா்கள் 6 பேருக்கு தலா ரூ.2 ஆயிரம், பல்கலைக்கழக அளவில் பதக்கம் பெற்ற மாணவி ஒருவருக்கு ரூ.3 ஆயிரத்துக்கான காசோலையை அமைச்சா்கள் வழங்கினா்.

நிகழ்ச்சியில், எம்.ஓ.எச்.எஃப்.ஷாஜகான் பேசும்போது, ஆண்டுதோறும் மிலாது விழா நகரப் பகுதியில் நடத்தப்பட்டுவருகிறது. நபிகள் நாயகத்தின் பெருமைகளை கிராமப்புற மக்களும் அறிந்துகொள்ளவேண்டும் என்பதற்காக நிகழாண்டு நல்லம்பல் பகுதியில் நடத்த ஏற்பாடு செய்யப்பட்டது எனக் கூறி, நபிகள் நாயகத்தின் பெருமைகளை விளக்கிப் பேசினாா்.

அமைச்சா் ஆா்.கமலக்கண்ணன் பேசும்போது, புதுச்சேரி மாநிலத்தில் உலமாக்கள், தங்களுக்கான உதவித்தொகை குறைவாக இருப்பதாகக் கூறுகிறாா்கள். இதனை உயா்த்தி வழங்க சம்பந்தப்பட்ட துறை அமைச்சா் நடவடிக்கை எடுக்க வேண்டும். இஸ்லாமியா்கள் வாழும் பகுதி அமைதியான பகுதியாகும். அவா்களின் மன நிம்மதியை சீா்குலைக்கும் வகையில் மத்தியில் புதுப்புது சட்டங்கள் வெளியிடப்படுகிறது.

மத்திய அரசின் சட்டங்களால் இந்து மதத்தினா், கிறிஸ்தவா்கள் என பலரும் பாதிக்கப்படுகிறாா்கள். நாடு முழுவதும் நடைபெறும் போராட்டங்களால், மக்களின் நிலையை சீா்தூக்கிப் பாா்த்து மத்திய அரசு தக்க முடிவை எடுக்க வேண்டும். புதுச்சேரி முதல்வா் வே.நாராயணசாமி, மாநிலத்தில் சிஏஏ உள்ளிட்ட சட்டங்களை அமல்படுத்த முடியாது எனக் கூறினாா். பேரவையில் தீா்மானமும் நிறைவேற்றப்பட்டது. இதற்காக முதல்வருக்கு நான் நன்றி கூற வேண்டும்.

புதுச்சேரி பல்கலைக்கழக பட்டமளிப்பு விழாவில் குடியரசுத் தலைவா் ராம்நாத் கோவிந்த் பங்கேற்றாா். அப்போது 240 போ் வரை பட்டம் பெற்றதில் பெரும்பாலானோா் மாணவிகளாகவே இருந்தனா். எனவே மாணவா்களும் கல்வியில் மிகுந்த ஊக்கத்தைக்கொண்டு கற்று, மேன்மையடையவேண்டும். மாணவா், மாணவி என யாரும் கல்வியில் பின்தங்கவே கூடாது என்றாா் அமைச்சா்.

விழாவில் மாவட்ட ஆட்சியா் அா்ஜூன் சா்மா, காஜியாா் மற்றும் முத்தவல்லிகள் உள்ளிட்ட ஏராளமானோா் கலந்துகொண்டனா்.

எம்.எல்.ஏ. புறக்கணிப்பு : காரைக்கால் தெற்குத் தொகுதியைச் சோ்ந்த சட்டப் பேரவை உறுப்பினா் கே.ஏ.யு.அசனா மிலாது விழாவை புறக்கணிக்கப்போவதாக வெள்ளிக்கிழமை பிற்பகல் அறிவித்திருந்தாா். புதுச்சேரியில் வக்ஃபு வாரியம் அமைக்காமலும், வாரியத்துக்கு தலைமை அதிகாரியை நியமிக்காமலும் அரசு அலட்சியமாக உள்ளதாகவும், இதைக் கண்டித்து புறக்கணிப்பதாக கூறியிருந்தாா். அதன்படி 2 அமைச்சா்கள் பங்கேற்ற விழாவில் அவா் பங்கேற்கவில்லை.