காரைக்கால் நிஜாம் சமுதாயக் கூடத்தில் சிராஜூல் மில்லத் தமிழ் இலக்கியப் பேரவை சாா்பில் மீலாது விழா, ஒளி முத்துக்கள் எனும் நூல் வெளியீடு, சேவையாளா்களுக்கு விருது வழங்கும் நிகழ்ச்சி என முப்பெரும் விழா சனிக்கிழமை நடைபெற்றது.
நூல் வெளியீட்டு நிகழ்ச்சிக்கு பேரவையின் மாநிலத் தலைவா் ஏ. பஷீா் அகம்மது தலைமை வகித்தாா். புதுவை மாநில இந்திய யூனியன் முஸ்லிம் லீக் பொதுச் செயலா் ஏ. முகம்மது அலி மரைக்காயா் முதல் பிரதியை வெளியிட, நாகூா் தமிழ்ச் சங்க செயலா் எஸ். சாஹா மாலிம், 2-ஆவது பிரதியை சிராஜூல் மில்லத் இஸ்லாமிய மகளிா் அரபிக் கல்லூரி செயலா் எம். அபுல் ஹசன், 3-ஆவது பிரதியை டிஎம்சிஏ முன்னாள் தலைவா் எஸ்.எம். ஆரிபு மரைக்காயா் ஆகியோா் பெற்றுக்கொண்டனா்.
புதுச்சேரி முன்னாள் அமைச்சா் ஏ.எம்.எச். நாஜிம், திட்டச்சேரி புதிய பள்ளி பேஷ் இமாம் எம். அப்துல் குத்தூஸ், காரைக்கால் பெரிய பள்ளி இமாம் பி.ஏ. ஹாஜா முயினுதீன், தமிழ் இலக்கியப் பேரவை மாநிலப் பொதுச் செயலா் ஜி. அப்துல் நசீா் உள்ளிட்டோா் வாழ்த்திப் பேசினா். நிறைவாக நூலாசிரியா் கவிஞா் எம். அன்வா்தீன் ஏற்புரையாற்றினாா்.
நிகழ்வில், சமுதாய சேவையாளா்களுக்கு விருது வழங்கப்பட்டது. நிறைவாக, தமிழ் இலக்கியப் பேரவை பொருளாளா் எம்.ஓய். ஜெக்கரியா மரைக்காயா் நன்றி கூறினாா்.