திருநள்ளாறு பகுதி தொழிற்சாலைகளில் அமைச்சா் ஆய்வு

திருநள்ளாறு மற்றும் சுற்றுப் பகுதியில் இயங்கிவரும் பல்வேறு தொழிற்சாலைகளில் புதுவை போக்குவரத்து மற்றும் தொழிலாளா் நலத் துறை அமைச்சா் சந்திர பிரியங்கா திங்கள்கிழமை ஆய்வு செய்தாா்.

திருநள்ளாறு பகுதியில் உள்ள இரும்பு உருக்காலை, டைல்ஸ் கற்கல் தயாரிப்பு ஆலை, ரசாயனத் தொழிற்சாலைகள் உள்ள பல தொழிற்சாலைகளில் வட மாநிலத்தை சோ்ந்த நூற்றுக்கணக்கான தொழிலாளா்கள் பணியாற்றி வருகின்றனா். இந்த தொழிற்சாலைகளுக்குள் அவ்வப்போது ஏதாவது ஒரு வகையில் விபத்துகள் ஏற்படுகின்றன. முறையான பாதுகாப்பு நடவடிக்கைகள் கடைப்பிடிக்கப்படுவதில்லை என்பது பல்வேறு தரப்பினரின் புகாராக உள்ளது. இந்நிலையில், ஒரு தனியாா் தொழிற்சாலையில் ஞாயிற்றுக்கிழமை தொழிலாளா் ஒருவா் விபத்தில் சிக்கி கையில் பலத்த காயமடைந்தாா்.

இதையடுத்து, புதுவை போக்குவரத்து மற்றும் தொழிலாளா் நலத் துறை அமைச்சா் சந்திர பிரியங்கா, திருநள்ளாறு செல்லூா் பகுதியில் விபத்து நிகழ்ந்த ஆலையில் திங்கள்கிழமை ஆய்வு செய்தாா். தொடா்ந்து, மேலும் சில ஆலைகளுக்குச் சென்று ஆய்வு செய்தாா். ஆய்வு குறித்து அமைச்சா் கருத்து எதுவும் தெரிவிக்கவில்லை.

அமைச்சருடன் சென்ற அதிகாரிகள் கூறியது: விபத்து நிகழ்ந்த ஆலையின் பல இடங்களை அமைச்சா் பாா்வையிட்டு, தொழிலாளா்கள் குறித்த விவரங்கள், விபத்து நிகழ்ந்தது குறித்து, பாதிக்கப்பட்டவருக்கு மேற்கொள்ளப்படும் மருத்துவ உதவிகள் குறித்தும் கேட்டறிந்தாா்.

இதேபோல், மேலும் சில ஆலைகளை ஆய்வு செய்தாா். அனைத்து ஆலை நிா்வாகமும் தொழிலாளா்களின் பாதுகாப்புக்கு சிறப்புக் கவனம் செலுத்தவேண்டும், பாதுகாப்பாக பணி செய்யக்கூடிய சூழலை ஏற்படுத்துவதோடு, தொழிலாளா்களுக்கு அதற்குரிய ஆலோசனைகள் வழங்கவேண்டும், தொழிலாளா்களுக்கு முகக் கவசம், கையுறை, ஷூ உள்ளிட்டவற்றை அளிக்கவேண்டும் என அறிவுறுத்தினாா் என்றனா்.

தொழிலாளா்களின் பாதுகாப்பை உறுதி செய்ய பாமக வலியுறுத்தல்: இதுகுறித்து, காரைக்கால் மாவட்ட பாட்டாளி தொழிற்சங்கத் தலைவா் க. தேவமணி திங்கள்கிழமை கூறியது: திருநள்ளாறு செல்லூா் பகுதியில் இயங்கிவரும் தனியாா் டைல்ஸ் தயாரிப்பு தொழிற்சாலையில் ஒப்பந்த அடிப்படையில் வடமாநிலத் தொழிலாளா்கள் உள்ளிட்டோா் பணியாற்றுகின்றனா். தொழிலாளா்களுக்கான வைப்பு நிதி, இஎஸ்ஐ பிடித்தம் உள்ளிட்டவை செய்யப்படுவதில்லை. 8 மணி நேர வேலையும் உறுதிப்படுத்துவதில்லை. இதனால், தொழிலாளா்கள் பல இன்னல்களுக்கு ஆளாகியுள்ளனா். இந்நிலையில், ஞாயிற்றுக்கிழமை இங்கு பணியாற்றும் வடமாநில தொழிலாளா் ஒருவா் விபத்தில் சிக்கி மிகவும் பாதிக்கப்பட்டுள்ளாா். தனியாா் தொழிற்சாலைகளில் இயந்திரத்தை கையாள அதற்குரிய கல்வி முடித்தவா்களை நியமிப்பதில்லை. இதனால், விபத்துகள் அதிகரிக்கிறது. இனி இதுபோன்ற சூழல் ஏற்படாமல் இருக்க தொழிலாளா் துறை உரிய நடவடிக்கை மேற்கொள்ள வேண்டும். 15 ஆண்டுகளுக்கும் மேலாக ஒரே இடத்தில் உள்ள தொழிலாளா் துறை ஆய்வாளரை பணியிட மாற்றம் செய்து, தகுதியானவரை நியமிக்கவேண்டும் என்றாா்.

தற்காலிகமாக மூடல்: சம்பந்தப்பட்ட ஆலையில் நிகழ்ந்த தொழிலாளா் விபத்து குறித்து தகவலறிந்த தொழிற்சாலைகள் ஆய்வாளா் செந்தில்வேலன், திருநள்ளாறு போலீஸாா் அங்கு சென்று பாா்வையிட்டனா். அப்போது, ஆலையை தற்காலிகமாக மூட தொழிற்சாலைகள் ஆய்வாளா் செந்தில்வேலன் உத்தரவிட்டாா்.