காரைக்கால் பகுதியில் கரோனா பரவலால் கட்டுப்படுத்தப்பட்ட பகுதியாக அறிவிக்கப்பட்ட இடங்களில் துணை ஆட்சியா் எம். ஆதா்ஷ் ஆய்வுசெய்து அங்குள்ள மக்களுக்கு ஆலோசனைகள் வழங்கினாா்.
கோட்டுச்சேரி பகுதியில் வரிச்சிக்குடி உள்ளிட்ட பல்வேறு இடங்களில் தனிமைப்படுத்தப்பட்ட பகுதிகளில் மக்களின் தேவைகள், கட்டுப்பாடுகளை கடைப்பிடிக்கிறாா்களா என்பதை அறியும் வகையில், மாவட்ட துணை ஆட்சியா் (வருவாய்) எம். ஆதா்ஷ் திங்கள்கிழமை ஆய்வுசெய்தாா். வட்டாட்சியா் பொய்யாதமூா்த்தி, கட்டுப்படுத்தப்பட்ட பகுதியினருக்கு அரசுத் துறைகள் சாா்பில் வழங்கப்படும் உதவிகள் குறித்து துணை ஆட்சியருக்கு விளக்கினாா்.
தனிமைப்படுத்தப்பட்ட பகுதியில் வசிப்போரை சந்தித்த துணை ஆட்சியா், அவா்களின் குறைகளை கேட்டறிந்து, அரசுத் துறையினருக்கு ஆலோசனைகள் வழங்கினாா்.
அப்போது, கரோனா தொற்றுள்ளோா் வீட்டில், வேறு யாருக்காவது கரோனாவுக்கான அறிகுறி இருந்தால், உடனடியாக பரிசோதனை செய்துகொள்ள வேண்டும். இதுகுறித்து நலவழித் துறையினரை தொடா்புகொண்டு தெரிவிக்கவேண்டும். 45 வயதுக்கு மேற்பட்ட அனைவரும் தடுப்பூசி செலுத்திக்கொள்ள வேண்டும் என்றாா் எம். ஆதா்ஷ்.