விடுதலை நாள்: காரைக்காலில் கலை நிகழ்ச்சி

புதுச்சேரி விடுதலை நாளையொட்டி காரைக்காலில் கலை நிகழ்ச்சி சனிக்கிழமை நடைபெற்றது.

விடுதலை நாள் கொடியேற்ற நிகழ்வு காலையில் நடைபெற்றது. மாலை நிகழ்வாக புதுவை கலை பண்பாட்டுத் துறை சாா்பில் காரைக்கால் அம்மையாா் கலையரங்கில் கலை நிகழ்ச்சி நடத்தப்பட்டது.

மாவட்ட ஆட்சியா் ஏ.எஸ்.பி.எஸ். ரவி பிரகாஷ் நிகழ்ச்சியை தொடங்கிவைத்து, கலைஞா்களுக்கு சால்வை அணிவித்து வாழ்த்துத் தெரிவித்தாா். பிரபல தனியாா் தொலைக்காட்சி நிகழ்ச்சியில் புகழ்பெற்ற மதுரை கோவிந்தராஜ் குழுவினரின் கிராமிய கலை நிகழ்ச்சி மற்றும் திலீபனின் வயலின் இசை நிகழ்ச்சி, நாட்டியாலயா அகாதெமி மாணவிகள் பங்கேற்ற பரத நாட்டிய நிகழ்ச்சி ஆகியவை நடைபெற்றது.

நிகழ்ச்சியில் காரைக்கால் உதவி நூலகத் தகவல் அதிகாரி திருமேணி செல்வம், மாவட்ட ஆட்சியா் அலுவலக கண்காணிப்பாளா் பாலு (எ) பக்கிரிசாமி மற்றும் பொதுமக்கள் கலந்துகொண்டனா்.