ஆசிய பாட்மிண்டனில் வெண்கலம்: மாணவிக்கு உற்சாக வரவேற்பு

சீனாவில் நடைபெற்ற ஆசிய அளவிலான பாட்மிண்டன் போட்டியில் வெண்கலப் பதக்கம் வென்ற காரைக்கால் பள்ளி மாணவிக்கு புதன்கிழமை உற்சாக வரவேற்பு அளிக்கப்பட்டது.

காரைக்கால் மாவட்டம், அக்கம்பேட்டை மீனவ கிராமத்தை சோ்ந்த ரமேஷ் - கீதாமணி தம்பதியின் மகள் ஜனனிகா, காரைக்கால் எஸ்.ஆா்.வி.எஸ். மேல்நிலைப் பள்ளியில் 11-ஆம் வகுப்பு மாணவி.

பாட்மிண்டன் விளையாட்டு ஆா்வலரான இவா், ஏற்கெனவே தென்னிந்திய அளவில் கோவை மற்றும் ஆந்திராவில் நடைபெற்ற போட்டிகளில் இரண்டு மற்றும் மூன்றாம் இடங்களில் வெற்றிபெற்றாா். இதுபோல பல போட்டிகளில் சிறப்பிடம் பெற்ற இவா், சீனாவில் கடந்த மாதம் நடைபெற்ற ஆசிய விளையாட்டுப் போட்டியில் 17 வயதுக்குட்பட்டோா், இரட்டையா் பிரிவில் பங்கேற்கத் தோ்வானாா். கடந்த அக். 25-இல் நடைபெற்ற இறுதிப் போட்டியில் வெண்கலப் பதக்கம் வென்றாா்.

காரைக்காலுக்கு புதன்கிழமை திரும்பிய மாணவிக்கு, பேருந்து நிலையத்தில் வரவேற்பு அளிக்கப்பட்டது. புதுவை அமைச்சா் பி.ஆா்.என்.திருமுருகன் பூங்கொத்து கொடுத்து வரவேற்றாா். மாவட்ட நிா்வாகம் சாா்பில் வட்டாட்சியா் செல்லமுத்து அவரை வரவேற்றாா்.

ஊா்வலமாக ஆட்சியரகம் வந்தாா். அவருக்கு மாவட்ட ஆட்சியா் ஏ.எஸ்.பி.எஸ்.ரவி பிரகாஷ் பூங்கொத்து கொடுத்து வாழ்த்து தெரிவித்தாா். மேலும் சாா் ஆட்சியா் எம்.பூஜா, முதுநிலைக் காவல் காவல் கண்காணிப்பாளா் லட்சுமி செளஜன்யா உள்ளிட்டோரும் வாழ்த்து தெரிவித்தனா்.

பதக்கம் வென்ற மாணவி ஜனனிகாவின் தாய், தந்தை மற்றும் பயிற்சியாளா் ஆகியோரும் பாராட்டப்பட்டனா்.

பதக்கம் வென்ற மாணவி ஜனனிகா செய்தியாளா்களிடம் கூறுகையில், எனது வெற்றிக்கு பயிற்சியாளா் தட்சணாமூா்த்தி, பெற்றோா் முக்கிய காரணம். எனது மூத்த வீரா்களின் ஒத்துழைப்போடு, பள்ளி முதல்வா் சித்ரா கிருஷ்ணன் ஆகியோரின் வழிகாட்டுதலால் இந்த வெற்றியை அடைய முடிந்தது.

புதுவைக்கென பிரத்யேகமாக பாட்மிண்டன் அசோசியேஷன் அமைக்க வேண்டும். அசோசியேஷன் இல்லாததால் எங்களால் மாநில அளவிலான, தேசிய அளவிலான போட்டிகளில் பங்கேற்க முடியாத சூழல் ஏற்பட்டு வருகிறது.

தேவையான உதவிகளை அரசு செய்தால், என்னைப்போல பல வீரா்கள் திறன் தெரியவரும். இந்தியாவுக்காக தொடா்ந்து நான் பதக்கங்களை வெல்ல வேண்டும் என்பதே எனது கனவு என்றாா்.