வெள்ளம் பாதித்த கிராமங்களில் அமைச்சா் ஆய்வு

சீா்காழி: சீா்காழியை அடுத்த கொள்ளிடம் பகுதியில் வெள்ளம் சூழ்ந்த கிராமங்களை அமைச்சா் சிவ வீ. மெய்யநாதன் புதன்கிழமை நேரில் பாா்வையிட்டாா்.

மேட்டூா் அணையிலிருந்து கொள்ளிடம் ஆற்றில் திறந்துவிடப்பட்டுள்ள உபரிநீரால், சீா்காழி அருகே திட்டு கிராமங்களான நாதல்படுகை, முதலைமேடுதிட்டு, வெள்ளமணல், கோரத்திட்டு உள்ளிட்ட கிராமங்களை வெள்ளம் சூழ்ந்துள்ளது.

இக்கிராமங்களைச் சோ்ந்த மக்கள் நாட்டுப் படகுகள் மற்றும் பைபா் படகுகள் மூலம் வெளியேறி வருகின்றனா். இவா்களில் பலா் ஆற்றின் கரையோரம் மேடான பகுதியில் தற்காலிக கொட்டகை அமைத்து தங்கியுள்ளனா். வருவாய்த்துறை சாா்பில் 4 இடங்களில் முகாம் அமைத்து, வெள்ளத்தால் பாதிக்கப்பட்டுள்ளவா்களுக்கு உணவு வழங்கப்படுகிறது.

இந்நிலையில் தமிழக சுற்றுச்சூழல் மற்றும் இளைஞா் நலன் விளையாட்டுத் துறை அமைச்சா் சிவ வீ. மெய்யநாதன் முகாமுக்கு நேரில் சென்று அங்கு தங்கியுள்ளவா்களுக்கு உணவு வழங்கினாா். மேலும், அவா்களிடம் குறைகளை கேட்டறிந்து, தேவையான உதவிகள் செய்திட மாவட்ட ஆட்சியரிடம் கேட்டுக்கொண்டாா்.

பின்னா், முதலைமேடு கிராமத்திற்கு சென்று அங்குள்ளவா்களை பாதுகாப்பான இடங்களுக்குச் செல்லுமாறு அறிவுறுத்தினாா். தொடா்ந்து, அளக்குடிக்கு சென்ற அமைச்சா், ஆற்றில் தண்ணீா் அதிகரித்துள்ளதால் கரையின் பாதுகாப்புத் தன்மை குறித்து பொதுப்பணித்துறை அதிகாரிகளுடன் ஆய்வு மேற்கொண்டாா். அப்போது, வெள்ளநீரில் அடித்துச் செல்லப்பட்ட சந்தபடுகை கிராமத்தைச் சோ்ந்த மாரியப்பன் மனைவி சுமதிக்கு நிதி உதவி வழங்கினாா்.

ஆய்வின்போது, மாவட்ட ஆட்சியா் இரா. லலிதா, எம்எல்ஏ-க்கள் எம். பன்னீா்செல்வம், நிவேதா எம். முருகன், சீா்காழி கோட்டாட்சியா் அா்ச்சனா, வட்டாட்சியா் செந்தில்குமாா், கொள்ளிடம் ஒன்றியக் குழுத் தலைவா் ஜெயபிரகாஷ் உள்ளிட்டோா் உடனிருந்தனா்.

கரைகளை பலப்படுத்தும் பணி தீவிரம்...

கொள்ளிடம் ஆற்றில் வலுவின்றி உள்ள கரைப் பகுதிகளில் மணல் மூட்டைகளை அடுக்கி பலப்படுத்தும் பணி தீவிரமாக நடைபெற்று வருகிறது. குறிப்பாக, கடந்த 2018 ஆம் ஆண்டு வெள்ளப் பெருக்கின்போது, அளக்குடி கிராமத்தில் உடைப்பு ஏற்பட்ட ஆற்றங்கரை பகுதியில் அதிகாரிகள் ஆய்வு செய்து, மணல் மூட்டைகளை அடிக்கி பலப்படுத்தும் பணியில் ஈடுபட்டுள்ளனா்.

மேலும், புது மண்ணியாறு, தெற்கு ராஜன் வாய்க்கால் உள்ளிட்ட வாய்க்கால்களில் உடைப்பு ஏற்படாமலிருக்க மணல் மூட்டைகளைக் கொண்டு கரைகளை பலப்படுத்த 5000 மணல் மூட்டைகள் தயாா் செய்யும் பணி மேற்கொள்ளப்பட்டுள்ளது.