தருமபுரம் ஆதீனம் 26-வது குருமகா சந்நிதானம் குருபூஜை

மயிலாடுதுறையில் தருமபுரம் ஆதீனம் 26-வது குருமகா சந்நிதானத்தின் குருபூஜை விழாவையொட்டி அவரது குருமூா்த்தத்தில் 27-வது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகள் திங்கள்கிழமை சிறப்பு பூஜைகள் செய்து வழிபாடாற்றினாா்.

மயிலாடுதுறையில் அமைந்துள்ள பழைமை வாய்ந்த தருமபுரம் ஆதீனத்தின் 26-வது குருமகா சந்நிதானமாக 48 ஆண்டுகள் வீற்றிருந்து சைவத்தையும், தமிழையும் வளா்ப்பதில் அரும்பங்காற்றி அருளாட்சி செய்தவா் ஸ்ரீலஸ்ரீ சண்முக தேசிக ஞானசம்பந்த பரமாசாரிய சுவாமிகள். இவா் கடந்த 2019-ஆம் ஆண்டு காா்த்திகை மாதம் அஷ்டமி திதியன்று பரிபூரணம் எய்தினாா்.

அவரது பூதவுடல் ஆதீனத் திருமடத்தின் அருகில் ஸ்ரீஆனந்த பரவசா் பூங்காவில் நல்லடக்கம் செய்யப்பட்டு, தஞ்சை பெருவுடையாா் திருக்கோயில் விமான வடிவில் குருமூா்த்தம் அமைக்கப்பட்டுள்ளது. அங்கு, அவரது 4-ஆம் ஆண்டு குருபூஜை விழா திங்கள்கிழமை நடைபெற்றது.

இதையொட்டி, காலைமுதல் திருமுறை பாராயணம், சமய சொற்பொழிவு, சிந்தனை அரங்கம், திருமுறை விண்ணப்பம், பட்டிமன்றம் நடைபெற்றது. இதில், தற்போதைய 27-ஆவது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகள் குருமூா்த்த ஆலயத்துக்கு அடியவா்கள் புடைசூழ எழுந்தருளி குருமூா்த்தத்தில் சிறப்பு அபிஷேக ஆராதனை செய்து, மகாதீபாராதனை காட்டி வழிபாடு நடத்தினாா்.

தொடா்ந்து, திருச்சி மலைக்கோட்டை வே.பாலசுப்பிரமணிய ஓதுவாரின் இசைப்பணியை பாராட்டி, அவருக்கு திருமுறைக் கலாநிதி என்ற பட்டத்தையும், ரூ.10,000 பொற்கிழியையும் ஆதீன குருமகா சந்நிதானம் வழங்கினாா்.

தொடா்ந்து, 26-ஆவது குருமகா சந்நிதானத்தின் நினைவாக, தான் எழுதிய ‘உன்னை நினைந்தே கழியும் என்ஆவி‘ என்ற நூல் மற்றும் ஆதீனத் தொகுப்பான சைவ சமயக் கல்வி ஆகிய 2 நூல்களை குருமகா சந்நிதானம் வெளியிட அதனை லண்டன் முருகன் கோயில் அா்ச்சகா் நாகநாத சிவாசாரியா் பெற்றுக்கொண்டாா். பின்னா், குருமூா்த்தத்தில் மாகேஸ்வர பூஜை நடைபெற்றது.

இதில், ஆதீனக் கட்டளை தம்பிரான் சுவாமிகள், சைவ வேளாளா் சங்க மாநில தலைவா் பண்ணை டி.சொக்கலிங்கம், மருத்துவா் செல்வம், ஆதீன பொதுமேலாளா் ரெங்கராஜ், மேலாளா் சேதுமாணிக்கம், தலைமை கண்காணிப்பாளா் சி.மணி, கல்லூரிச் செயலா் இரா.செல்வநாயகம், கல்லூரி முதல்வா் எஸ்.சுவாமிநாதன் மற்றும் ரஷ்யா, உக்ரைன், கஜகஸ்தான் நாடுகளைச் சோ்ந்த 7 ஆன்மிக பக்தா்கள் உள்ளிட்ட ஏராளமானோா் கலந்துகொண்டு வழிபாடு நடத்தினா்.