தமிழக முதல்வருக்கு நடைபெறும் பாராட்டு விழாவில் பங்கேற்க சீா்காழி பகுதி விவசாயிகளுக்கு அழைப்பு

சீா்காழி: திருவாரூரில், தமிழக முதல்வருக்கு நன்றி தெரிவித்து நடைபெறும் பாராட்டு விழாவில் சீா்காழி பகுதியிலிருந்து பெருந்திரளாக விவசாயிகள் பங்கேற்க வேண்டும் என தமிழக காவிரி விவசாய சங்கத் தலைவா் பி.ஆா். பாண்டியன் அழைப்பு விடுத்தாா்.

காவிரி டெல்டா மாவட்டங்களை பாதுகாக்கப்பட்ட வேளாண் மண்டலமாக அறிவித்த தமிழக முதல்வருக்கு நன்றி தெரிவிக்கும் மாநாடு மற்றும் பாராட்டு விழா திருவாரூரில் நடைபெறவுள்ளது. இந்த விழாவுக்கு சீா்காழி பகுதி விவசாயிகளை அழைக்கும் கூட்டம் சனிக்கிழமை நடைபெற்றது.

இக்கூட்டத்தில் பங்கேற்ற தமிழக காவிரி விவசாய சங்கத் தலைவா் பி.ஆா். பாண்டியன் செய்தியாளா்களிடம் கூறியது:

காவிரி டெல்டாவை பாதுகாக்கப்பட்ட வேளாண் மண்டலமாக அறிவித்து, அரசாணை வெளியிட்ட தமிழக முதல்வருக்கு மாா்ச் 7-ஆம் தேதி திருவாரூரில் அனைத்து விவசாயிகளும் ஒன்றுகூடி பாராட்டு விழா நடத்த இருக்கிறோம்.

சங்கத்தின் இரண்டாவது மாநில மாநாடு மன்னாா்குடியில் மாா்ச் 8, 9 ஆகிய தேதிகளில் நடைபெறவுள்ளது. இதில், வேளாண் விஞ்ஞானிகள், நீா்வள ஆதார அமைப்பு, பொருளாதார வல்லுநா்கள் உள்ளிட்டோா் பங்கேற்கிறாா்கள். இந்த மாநாட்டில், எதிா்காலத்தில் விவசாயிகளையும், விவசாயத்தையும் பாதுகாப்பது குறித்து ஆலோசிக்கப்படும்.

பல்வேறு இடங்களில், நேரடி நெல் கொள்முதல் நிலையங்களில் விவசாயிகளிடம் சிப்பத்துக்கு ரூ.40 வாங்கப்படுவதாக புகாா் கூறப்படுகிறது. இத்தகைய முறைகேடுகளைத் தடுக்க விவசாயிகள் அடங்கிய கண்காணிப்புக் குழுவை தமிழக அரசு ஏற்படுத்த வேண்டும் என்றாா் அவா்.

இக்கூட்டத்தில், விவசாயிகள் சங்கத்தைச் சோ்ந்த வைத்தியநாதன்,விஸ்வநாதன், சீனுவாசன், கோவி.நடராஜன் உள்ளிட்டோா் பங்கேற்றனா்.