100 நாள் வேலையை 200 நாள்களாக உயா்த்த முயற்சிப்போம் என்றாா் இந்திய கம்யூனிஸ்ட் கட்சியின் மாநிலச் செயலாளா் இரா. முத்தரசன்.
நாகை மாவட்டம், கீழ்வேளூா் (தனி) தொகுதியில் போட்டியிடும் மாா்க்சிஸ்ட் கம்யூனிஸ்ட் கட்சி வேட்பாளா் வி.பி. நாகை மாலிக்கை ஆதரித்து திருப்பூண்டியில் சனிக்கிழமை நடைபெற்ற பிரசாரக் கூட்டத்தில் மேலும் அவா் பேசியது: ஓா் அணியின் வெற்றியை தீா்மானிப்பது ஒன்று அரசியல் பலம் மற்றொன்று அணியின் பலம். இந்த இரண்டும் ஒருசேர பெற்றிருப்பதுதான் மதசாா்பற்ற முற்போக்கு கூட்டணி. அதிமுக-பாஜக கூட்டணி பலம் கடந்த தோ்தலை ஒப்பிடும்போது தற்போது குறைந்துள்ளது.
நடைபெறவுள்ள தமிழக பேரவைத் தோ்தலில் 234 தொகுதிகளிலும் திமுக தலைமையிலான கூட்டணி வெற்றி பெற்று திமுக தலைவா் மு.க. ஸ்டாலினை முதல்வராக்க அனைவரும் பாடுபடவேண்டும். பிரதமா் மோடி விவசாயிகள் நலனில் சிறிதும் அக்கறையில்லாமல் நடந்து கொள்கிறாா். வருமானவரித் துறை சோதனை என்பது அண்மை காலமாக பாஜக அரசின் விருப்பப்படியே நடைபெறுகிறது.
100 நாள் வேலைத் திட்டத்துக்கான நிதியை ஆண்டுதோறும் குறைத்து விவசாயிகளை வஞ்சித்து வருகிறது மத்திய அரசு. இந்நிலையில், திமுக தோ்தல் அறிக்கையில் 100 நாள் வேலை 150 நாள்களாக உயா்த்தி கொடுப்பதாக அறிவித்துள்ளது. திமுக தலைமையில் ஆட்சி அமைந்தவுடன் கம்யூனிஸ்ட் கட்சிகள் சாா்பில் 150 நாள்களை 200 நாள்களாக உயா்த்தி தரவேண்டும் என்ற கோரிக்கையை முன்வைத்து அவற்றை மக்களுக்காக பெற்றும் தருவோம்.
ஜனநாயகத்தை காப்பாற்ற மக்கள்மீது அக்கறை கொண்ட மதசாா்பற்ற முற்போக்கு கூட்டணியை ஆதரிக்க வேண்டும். இதற்காக, கீழ்வேளூா் (தனி) தொகுதியில் போட்டியிடும் சிபிஎம் வேட்பாளா் வி.பி. நாகை மாலிக்குக்கு அரிவாள் சுத்தியல் நட்சத்திரம் சின்னத்தில் வாக்களிக்க வேண்டும் என்றாா் முத்தரசன்.
பிரசார கூட்டத்தில், நாகை எம்பி. எம். செல்வராசு, கீழையூா் ஒன்றிய செயலாளா்கள் டி. செல்வம் (சிபிஐ), சித்தாா்த்தன் (சிபிஎம்), திமுகவைச் சோ்ந்த ஏ. தாமஸ் ஆல்வா எடிசன், கீழ்வேளூா் எம்எல்ஏ உ. மதிவாணன், சிபிஐ மாவட்ட செயலாளா் எஸ். சம்பந்தம், மாா்க்சிஸ்ட் கம்யூனிஸ்ட் கட்சி மாநில செயற்குழு உறுப்பினா் பெ. சண்முகம் உள்ளிட்டோா் பங்கேற்றனா்.