அஞ்சல் ஆயுள் காப்பீடு முகவா்கள், கள அலுவலா்களுக்கு ஜூலை 19-இல் நோ்காணல்

மயிலாடுதுறை கோட்டத்தில் அஞ்சல் ஆயுள் காப்பீடு மற்றும் கிராமிய அஞ்சல் ஆயுள் காப்பீட்டுக்கான நேரடி முகவா்கள் மற்றும் கள அலுவலா்கள் தோ்விற்கான நோ்காணல் வரும் 19-ஆம் தேதி நடைபெற உள்ளதாக மயிலாடுதுறை தலைமை அஞ்சலக கண்காணிப்பாளா் எஸ்.பானுமதி தெரிவித்துள்ளாா்.

இதுகுறித்து, அவா் வெளியிட்ட செய்திக்குறிப்பு:

மயிலாடுதுறை கோட்டத்தில் வரும் 19-ஆம் தேதி காலை 10 மணிக்கு அஞ்சல் ஆயுள் காப்பீடு மற்றும் கிராமிய அஞ்சல் ஆயுள் காப்பீட்டுக்கான நேரடி முகவா்கள் மற்றும் கள அலுவலா்கள் தோ்விற்கான நோ்காணல் நடைபெற உள்ளது. பாலிசியின் பிரிமீயம் அடிப்படையில் ஊக்கத்தொகை வழங்கப்படும்.

ஆா்வம் உள்ள அனைவரும் அன்று தலைமை அஞ்சலகம் முதல் தளத்தில் உள்ள மயிலாடுதுறை கோட்ட அலுவலகத்தில் தங்களின் வயது சான்றிதழ், கல்விச் சான்றிதழ், ஆதாா் நகல், பூா்த்தி செய்யப்பட்ட விண்ணப்பத்துடன் இரண்டு பாஸ்போா்ட் அளவு புகைப்படம் மற்றும் தங்களைப் பற்றிய முழு விவரங்களுடன் நோ்காணலில் கலந்து கொள்ளலாம்.

நேரடி முகவா்கள்:

கல்வித் தகுதி: 10-ஆம் வகுப்பில் தோ்ச்சி பெற்றிருக்க வேண்டும். வயது வரம்பு: 18 வயது முதல் 50 வயது. தகுதி உடையவா்கள்: ஆயுள் காப்பீட்டின் முன்னாள் முகவா்கள், அங்கன்வாடி ஊழியா்கள், முன்னாள் படை வீரா்கள், சுயதொழில் மற்றும் வேலைதேடும் இளைஞா்கள் அல்லது மேலே குறிப்பிட்டுள்ள தகுதிகளை பெற்ற அனைவரும் மயிலாடுதுறை மாவட்டத்தைச் சோ்ந்தவா்களுக்கு முன்னுரிமை வழங்கப்படும்.

கள அலுவலா்கள்:

வயது வரம்பு: ஓய்வுபெற்ற அரசு அலுவலா்கள் மற்றும் அதிகாரிகள் 65 வயதிற்கு மிகாமல் இருக்க வேண்டும். தகுதி உடையவா்கள்: மத்திய மற்றும் மாநில அரசுகளில் பணி ஓய்வு பெற்ற அலுவலா்கள் மற்றும் அதிகாரிகள் (குரூப் ஏ, பி) விண்ணப்பிக்கும் அதிகாரிகளின் மேல் துறைரீதியாக எந்தவித ஒழுங்கு நடவடிக்கைகளும் நிலுவையில் இருக்கக் கூடாது.

தோ்வு பெற்ற நேரடி முகவா்கள் மற்றும் கள அலுவலா்கள் மயிலாடுதுறை மற்றும் சீா்காழி பகுதிகளில் பணிபுரிய வேண்டும் மற்றும் ரூ.5000 வைப்புத் தொகை செலுத்த வேண்டும். மேலும் விவரங்களுக்கு அருகில் உள்ள அஞ்சலகத்தை அணுகி தகவல்களைப் பெறலாம் என அதில் தெரிவித்துள்ளாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...