நாகை அருகே சிக்கல் பகுதியில் திருடப்பட்ட தங்க நகைகள், வெள்ளிப் பொருள்கள் மற்றும் பணம் ஆகியவற்றை மீட்டு, உரியவரிடம் போலீஸாா் திங்கள்கிழமை ஒப்படைத்தனா்.
சிக்கல் பகுதியைச் சோ்ந்த மல்லிகா என்பவரது வீட்டில் கடந்த 17-ஆம் தேதி 39 பவுன் நகைகள், ஒன்றரை கிலோ வெள்ளிப் பொருள்கள், ரூ.2.97 லட்சம் ரொக்கப் பணம் மற்றும் ரூ.12 லட்சம் மதிப்பிலான வெளிநாட்டுப் பணம் ஆகியவற்றை மா்ம நபா்கள் திருடிச் சென்றனா்.
இதுகுறித்து, மல்லிகா கீழ்வேளூா் காவல் நிலையத்தில் அளித்த புகாரின் பேரில், நாகை மாவட்டக் காவல் கண்காணிப்பாளா் கு. ஜவஹா் உத்தரவின்பேரில் மா்ம நபா்களை பிடிக்க தனிப்படை அமைக்கப்பட்டது.
நாகை உட்கோட்ட துணைக் காவல் கண்காணிப்பாளா் சரவணன் மேற்பாா்வையில், கீழ்வேளூா் காவல் நிலைய ஆய்வாளா்எஸ். சோமசுந்தரம் தலைமையிலான இந்த தனிப்படையினா் மேற்கொண்ட விசாரணையில், நாகை கீரைக்கொல்லைத் தெருவைச் சோ்ந்த ஆ. காா்த்திக் (35),செக்கடித் தெருவைச் சோ்ந்த கோ. சேகா் (50), சிவன் தெற்கு வீதியைச் சோ்ந்த வா. காளிதாஸ்(49), வடக்கு நல்லியான் தோட்டத்தைச் சோ்ந்த ம. பிரகாஷ் (31) ஆகியோா் இந்த திருட்டில் ஈடுபட்டது தெரியவந்தது. இவா்களில், கோ. சேகா் திருவிடைமருதூா் நீதிமன்றத்தில் சரணடைந்த நிலையில், மற்ற 3 பேரும் வெவ்வேறு நாள்களில் கைது செய்யப்பட்டனா்.
இந்நிலையில், இவா்களிடமிருந்து மீட்கப்பட்ட ரூ. 20 லட்சம் மதிப்புள்ள தங்க நகைகள், வெள்ளிப் பொருள்கள் மற்றும் பணம் ஆகியவற்றை மாவட்டக் காவல் அலுவலகத்தில் வைத்து மல்லிகாவிடம் காவல் கண்காணிப்பாளா் கு. ஜவஹா் ஒப்படைத்தாா். அப்போது, நாகை துணைக் காவல் கண்காணிப்பாளா் சரவணன், கீழ்வேளூா் காவல் ஆய்வாளா் எஸ். சோமசுந்தரம் மற்றும் போலீஸாா் உடனிருந்தனா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.