நாகை மீன்பிடித் துறைமுகத்தில் ஐஸ் கட்டி உற்பத்தி நிலையம், மீன்பதனக் கூடம் திறப்பு

நாகை மீன்பிடித் துறைமுகத்தில் புதிதாக அமைக்கப்பட்ட ஐஸ் கட்டி உற்பத்தி நிலையம் மற்றும் மீன் பதப்படுத்தும் மையத்தை தமிழக முதல்வா் மு.க. ஸ்டாலின் காணொலி மூலம் வியாழக்கிழமை திறந்துவைத்தாா்.

நாகை மீன்பிடித் துறைமுகத்தில் ஆண்டுக்கு சுமாா் 15 ஆயிரம் மெட்ரிக் டன் அளவுக்கு மீன்கள் வா்த்தகம் நடைபெறும் நிலையில், அங்கு அரசு சாா்பில் ஐஸ் கட்டி உற்பத்தி நிலையம் அமைத்து, மீனவா்களுக்குக் குறைந்த விலையில் ஐஸ் கட்டிகளை வழங்க வேண்டும், மீன்களை சுகாதாரமாக விற்பனை செய்ய மீன் பதப்படுத்தும் மையம் அமைக்க வேண்டும் என்பது மீனவா்களின் கோரிக்கையாக இருந்தது.

இந்தக் கோரிக்கைகளை நிறைவேற்ற தமிழக முதல்வா் உத்தரவிட்டதன் அடிப்படையில், ஊரக வளா்ச்சி மற்றும் ஊராட்சிகள் துறை சாா்பில் ஒருங்கிணைந்த கூட்டுறவு மேம்பாட்டுத் திட்டத்தின்கீழ் தேசிய கூட்டமைப்பு மேம்பாட்டுக் கழக நிதி மூலம் ரூ. 1.85 கோடியில் ஐஸ் கட்டி உற்பத்தி நிலையமும், கால்நடைப் பராமரிப்புத் துறை சாா்பில் ரூ. 1.14 கோடியில் மீன் பதப்படுத்தும் மையம் மற்றும் மீன் ஏலக் கூடமும் நாகை மீன்பிடித் துறைமுகத்தில் அமைக்கப்பட்டன.

இவற்றின் திறப்பு விழா வியாழக்கிழமை நடைபெற்றது. தமிழக முதல்வா் மு.க. ஸ்டாலின் காணொலி மூலம், ஐஸ் கட்டி உற்பத்தி நிலையத்தையும், மீன் பதப்படுத்தும் மையத்தையும் திறந்துவைத்தாா். இதையொட்டி, நாகை மீன்பிடித் துறைமுக ஐஸ் கட்டி உற்பத்தி நிலையத்தில் நடைபெற்ற நிகழ்ச்சியில், நாகை மாவட்ட ஆட்சியா் அ. அருண் தம்புராஜ் தலைமை வகித்துப் பேசுகையில், நாகை மீன்பிடித் துறைமுகத்தில் அரசு சாா்பில் அமைக்கப்பட்டுள்ள ஐஸ் கட்டி உற்பத்தி நிலையத்தில் நாள் ஒன்றுக்கு 30 மெட்ரிக் டன் ஐஸ் கட்டி உற்பத்தி செய்ய முடியும் எனவும், மீன் பதப்படுத்தும் மையம் மூலம் மீன்களை சுகாதாரமாகக் கையாண்டு விற்பனை செய்ய முடியும் எனவும் ஆட்சியா் தெரிவித்தாா்.

தமிழ்நாடு மீன்வளா்ச்சிக் கழகத் தலைவா் என். கௌதமன், கீழ்வேளூா் தொகுதி சட்டப்பேரவை உறுப்பினா் வி.பி. நாகை மாலி, மீன்வளத் துறை இணை இயக்குநா் தா. இளம்வழுதி, மீன்வளத் துறை உதவி இயக்குநா் கோ. ஜெயராஜ், செயற்பொறியாளா் (மீன்பிடித் துறைமுகம்) எஸ். கிருஷ்ணமூா்த்தி, அக்கரைப்பேட்டை ஊராட்சித் தலைவா் அழியாநிதி மனோகரன் உள்ளிட்டோா் பங்கேற்றனா்.