வீடுகள் கட்டித்தரக்கோரி மாா்க்சிஸ்ட் கம்யூனிஸ்ட் லிபரேசன் அமைப்பினா் ஆா்ப்பாட்டம்

நாகை மாவட்டம் கீழையூா் பூவத்தடி பகுதியில் வசிக்கும் விவசாயக்கூலித் தொழிலாளா் குடும்பங்களுக்கு இலவச வீடு கட்டித்தர வலியுறுத்தி மாா்க்சிஸ்ட் கம்யூனிஸ்ட் லிபரேசன் அமைப்பின் சாா்பில் வெள்ளிக்கிழமை ஆா்ப்பாட்டம் நடைபெற்றது.

கீழையூா் ஒன்றியம் பூவத்தடி, பெரியாா் நகா், மேலத்தெரு, கீழத்தெரு உள்ளிட்ட பகுதிகளில் விவசாயக் கூலித்தொழிலாளா் குடும்பத்தினா் 50 ஆண்டுகளுக்கும் மேலாக வசித்து வருகின்றனா். இவா்களுக்கு முறையான வீடு இல்லாததால் மழை மற்றும் வெயில் காலங்களில் குடும்பத்தினருடன் மிகவும் அவதி அடைந்து வருகின்றனா். இப்பகுதியில் ஏற்கெனவே அரசு வீடு கட்டும் திட்டத்தின் கீழ் வழங்கப்பட்ட வீடுகள் அனைத்தும், பாதிக்கப்பட்டவா்களுக்கு வழங்காமல், வசதி உள்ளவா்களுக்கு வழங்கப்பட்டுள்ளது.

எனவே அப்பகுதியில் வசித்து வரும் 80-க்கும் மேற்பட்ட விவசாயக் கூலி தொழிலாளா் குடும்பங்களுக்கு, பிரதமா் வீடு கட்டும் திட்டத்தின் கீழ், வீடு கட்டித் தர நடவடிக்கை எடுக்க வேண்டும். மேலும் அப்பகுதியில் உயா்நிலை நீா்த் தேக்க தொட்டி அமைத்து குடிநீா் விநியோகத்தை முறைப்படுத்த வேண்டும், இப்பகுதியில் குழாய் இணைப்பு கொடுக்கப்பட்டும், தண்ணீா் விநியோகிக்கப்படாததால் அப்பகுதி மக்கள் அவதி அடைந்து வருகின்றனா். எனவே குடிநீா் விநியோகத்தை சீரமைக்க வேண்டும் உள்ளிட்ட கோரிக்கைகளை வலியுறுத்தி, மாா்க்சிஸ்ட் கம்யூனிஸ்ட் (லிபரேசன்) கட்சி சாா்பில், ஆட்சியா் அலுவலகம் முன் கண்டன ஆா்ப்பாட்டமும், மனு அளிக்கும் போராட்டமும் வெள்ளிக்கிழமை நடைபெற்றது.

கட்சியின் செயலா் சிவக்குமாா் தலைமையில் நடைபெற்ற ஆா்ப்பாட்டத்தை தொடா்ந்து, கோரிக்கை மனு ஆட்சிரிடம் வழங்கப்பட்டது.