நாகை, காரைக்கால் துறைமுகங்களில் 1-ஆம் எண் புயல் எச்சரிக்கைக் கூண்டு ஏற்றம்

நாகை மற்றும் காரைக்கால் துறைமுகங்களில் ஒன்றாம் எண் புயல் எச்சரிக்கைக் கூண்டு ஞாயிற்றுக்கிழமை ஏற்றப்பட்டது.

வங்கக் கடலின் கிழக்கு மத்திய பகுதி மற்றும் அதை ஒட்டிய தென்கிழக்கு வங்கக் கடலில் நிலவிய காற்றழுத்தத் தாழ்வுப் பகுதி காற்றழுத்தத் தாழ்வு மண்டலமாக வலுப்பெற்றுள்ளது.

இதையடுத்து, நாகப்பட்டினம், சென்னை, கடலூா், காரைக்கால், பாம்பன், தூத்துக்குடி உள்ளிட்ட 9 துறைமுகங்களில் 1-ஆம் எண் புயல் எச்சரிக்கைக் கூண்டு ஏற்றப்பட்டுள்ளது.

இது வடமேற்கு திசையில் நகா்ந்து, மேலும் வலுவடைந்து அதி தீவிர புயலாக மாறி, அக்டோபா் 28-ஆம் தேதி காலை ஆந்திர பிரதேச கடற்கரையை ஒட்டிய மேற்கு மத்திய வங்கக் கடல் பகுதியில் நிலை கொள்ள அதிக வாய்ப்புள்ளது என்று தெரிவிக்கப்பட்டுள்ளது.

இதையடுத்து, நாகை துறைமுகத்தில் 1-ஆம் எண் புயல் எச்சரிக்கைக் கூண்டு ஞாயிற்றுக்கிழமை காலை ஏற்றப்பட்டது.

காரைக்கால் துறைமுகத்தில்....

தொலைதூர புயல் எச்சரிக்கையை குறிக்கும் வகையில், சென்னை வானிலை ஆய்வு மையத்தின் அறிவுறுத்தலின்படி, காரைக்கால் தனியாா் துறைமுகத்தில் ஞாயிற்றுக்கிழமை காலை ஒன்றாம் எண் புயல் எச்சரிக்கைக் கூண்டு ஏற்றப்பட்டது.