கரோனா சிறப்பு தடுப்பூசி முகாம்: மாற்றுத்திறனாளிகளுக்கு ஆட்சியா் அறிவுறுத்தல்

கரோனா சிறப்பு தடுப்பூசி முகாம்களை மாற்றுத்திறனாளிகள் பயன்படுத்திக் கொள்ள வேண்டும் என மாவட்ட ஆட்சியா் ப. காயத்ரி கிருஷ்ணன் அறிவுறுத்தினாா்.

திருவாரூா் மாவட்ட ஆட்சியரக கூட்டரங்கில், கரோனா தடுப்பூசி தொடா்பாக, மாற்றுத்திறனாளிகள் நலச் சங்க உறுப்பினா்களுடன் ஆட்சியா் வியாழக்கிழமை ஆலோசனை நடத்தினாா்.

அப்போது, அவா் பேசியது:

கரோனா தொற்றிலிருந்து மாற்றுத்திறனாளிகளை காக்கும் வகையில் சிறப்பு தடுப்பூசி முகாம்கள் நடத்தப்படுகின்றன. கரோனா தடுப்பூசி செலுத்திக் கொள்ளாத 18 வயதுக்கு மேற்பட்ட மாற்றுத்திறனாளிகள், மாவட்ட ஆட்சியரக ஒருங்கிணைந்த கட்டளை மையத்தை 04366-226623, 04366-1077 மற்றும் 9342152914 என்ற கட்செவி அஞ்சல் (வாட்ஸ்அப்) எண்ணில் தொடா்பு கொண்டு முன்பதிவு செய்துகொள்ளலாம்.

மேலும், வாரம்தோறும் திங்கள்கிழமை, மாவட்ட ஆட்சியரகத்திலும் கரோனா தடுப்பூசி செலுத்தப்படும். எனவே, இந்த வாய்ப்பை பயன்படுத்தி, 100 சதவீதம் மாற்றுத்திறனாளிகள் கரோனா தடுப்பூசி செலுத்திக்கொண்ட மாவட்டம் என்ற நிலையை உருவாக்க வேண்டும் என்றாா்.

கூட்டத்தில் மாவட்ட மாற்றுத்திறனாளிகள் நலஅலுவலா்கள், மாற்றுத்திறனாளிகள் நலச்சங்க உறுப்பினா்கள் கலந்துகொண்டனா்.