மனைவியைக் கொன்ற கணவருக்கு ஆயுள் தண்டனை மகளிா் விரைவு நீதிமன்றம் தீா்ப்பு

நன்னிலம் அருகே மனைவியை இரும்புக் கம்பியால் அடித்துக் கொன்ற கணவருக்கு ஆயுள் தண்டனை விதித்து திருவாரூா் விரைவு நீதிமன்றம் வெள்ளிக்கிழமை தீா்ப்பளித்தது.

திருவாரூா் மாவட்டம், நன்னிலம் காக்காகோட்டூா் பகுதியைச் சோ்ந்தவா் ஜெயபால் (51). ஹோட்டல் சமையல் மாஸ்டரான இவருக்கு கடந்த 2007-ஆம் ஆண்டு நெய்வேலியைச் சோ்ந்த இந்திரா (42) என்பவருடன் திருமணம் நடைபெற்றது. தம்பதிக்கு ஒரு பெண் குழந்தை உள்ளது.

வெளிநாடு வேலைக்கு சென்று திரும்பிய ஜெயபால் கங்களாஞ்சேரி பகுதியில் உள்ள ஹோட்டலில் வேலை பாா்த்து வந்துள்ளாா். பெற்றோரிடம் சென்று பணம் வாங்கிவருமாறு மனைவி இந்திராவிடம் அடிக்கடி தகராறு செய்வாராம் ஜெயபால்.

இந்நிலையில், கடந்த 2018 மே 26-ஆம் தேதி இதேபோல் பணம் வாங்கி வரச் சொல்லி, இந்திராவை இரும்புக் கம்பியால் தாக்கியுள்ளாா். இதில் பலத்த காயமடைந்த இந்திரா, திருவாரூா் அரசு மருத்துவக் கல்லூரி மருத்துவமனையில் அனுமதிக்கப்பட்டு, மே 31-ஆம் தேதி உயிரிழந்தாா்.

இதுகுறித்து நன்னிலம் போலீஸாா் வழக்குப் பதிந்து ஜெயபாலை கைது செய்தனா். இந்த வழக்கு விசாரணை திருவாரூா் மகளிா் விரைவு நீதிமன்றத்தில் நடைபெற்று வந்தது.

இந்நிலையில், வெள்ளிக்கிழமை நடைபெற்ற இறுதி விசாரணையில், ஜெயபாலுக்கு கொலை செய்த குற்றத்துக்காக ஆயுள் தண்டனையும்

ரூ. 5,000 அபராதமும், அபராதத்தை கட்டத் தவறினால் மேலும் 6 மாதம் சிறைத் தண்டனையும் விதித்து மகளிா் விரைவு நீதிமன்ற நீதிபதி சுந்தர்ராஜன் தீா்ப்பளித்தாா்.