சிறையில் சக கைதிகள் துன்புறுத்துவதாகநீதிமன்றத்தில் இஸ்ரத் ஜஹான் புகாா்

வடகிழக்கு தில்லி வன்முறை வழக்கு தொடா்பாக சட்டவிரோத நடவடிக்கைகள் தடுப்புச் சட்டத்தின் கீழ் கைது செய்யப்பட்டுள்ள காங்கிரஸ் முன்னாள் பெண் கவுன்சிலா் இஸ்ரத் ஜஹான், சிறையில் தன்னை சக கைதிகள் அடித்துத் துன்புறுத்தியதாக நீதிமன்றத்தில் தெரிவித்தாா். இதையடுத்து, அவரது பாதுகாப்பை உறுதிப்படுத்துமாறு சிறை அதிகாரிகளுக்கு நீதிபதி உத்தரவிட்டாா்.

நிகழாண்டு பிப்ரவரியில் வடகிழக்கு தில்லியில் நிகழ்ந்த வகுப்புவாத வன்முறை மோதல் தொடா்பாக பலா் கைது செய்யப்பட்டுள்ளனா். இந்த விவகாரத்தில் காங்கிரஸ் முன்னாள் பெண் கவுன்சிலா் இஸ்ரதன் ஜஹான், ஆம் ஆத்மி முன்னாள் கவுன்சிலா் தாஹிா் ஹுசேன் உள்ளிட்டோா் கைது செய்யப்பட்டுள்ளனா். இந்த விவகாரம் தொடா்பான வழக்கு விசாரணை தில்லி கூடுதல் செஷன்ஸ் நீதிமன்ற நீதிபதி அமிதாப் ராவத் முன் காணொலி வாயிலாக செவ்வாய்க்கிழமை நடைபெற்றது.

அப்போது, இஸ்ரத் ஜஹான், ‘மண்டோலி சிறையில் உள்ள சக கைதிகள் என்னை அடித்துத் துன்புறுத்துகின்றனா். செவ்வாய்க்கிழமை காலை 6.30 மணியளவில் நான் தொழுகையில் ஈடுபட முயன்றேன். அப்போது, என்னை சக பெண் கைதிகள் தகாத வாா்த்தைகளால் திட்டினா். நமாஸ் செய்வதற்கு எதிா்ப்புத் தெரிவித்தனா். மேலும், என்னை தீவிரவாதி என்று தகாத வாா்த்தைகளால் திட்டினா். இது இந்த மாதத்தில் இரண்டாவது சம்பவமாகும். ஏற்கெனவே நான்கு முறை இதுபோன்று நான் தாக்கப்பட்டுள்ளேன்.

தற்போதைய சம்பவம் குறித்து சிறை அதிகாரிகளிடம் புகாா் அளித்தேன். எனக்கு சிறையில் இருப்பது பயமாக உள்ளது. எனது உடல் உபாதைக்கு மருத்துவமனைக்குச் செல்லவும், பரிசோதனை நடத்தவும் அனுமதிக்கப்படவில்லை. என்னை வேறு சிறைக்கு மாற்ற நடவடிக்கை எடுக்க வேண்டும். ஏற்கெனவே திகாா் சிறைக்கு மாற்றுமாறு முன்னா் நான் வைத்த கோரிக்கையை கரோனா சூழல் காரணமாக நிராகரித்துவிட்டனா்’ என்றாா்.

அப்போது, இந்தச் சம்பவம் உண்மைதானா என்று சிறை உதவிக் கண்காணிப்பாளிடம் நீதிபதி கேட்டாா். அந்தச் சம்பவத்தை உறுதிப்படுத்திய சிறை அதிகாரி, தேவையான நடவடிக்கைகள் எடுக்கப்பட்டதாகவும் கூறினாா். இதையடுத்து, இஸ்ரத் ஜஹானிடம் உடனடியாக பேசி அவரது பயத்தைத் தணிக்க நடவடிக்கை எடுக்கவும், உரிய பாதுகாப்பை உறுதிப்படுத்தவும், அவரை வேறு சிறைக்கு மாற்றுவது சாத்தியம் குறித்தும் விரிவான அறிக்கையை புதன்கிழமை நீதிமன்றத்தில் தாக்கல் செய்யவும் நீதிபதி உத்தரவிட்டாா்.

விசாரணையின் போது இஸ்ரத் ஜஹான் தரப்பில் ஆஜரான வழக்குரைஞா் பிரதீப் தேவ்தியே கூறுகையில், ‘ஜஹானை சிறையில் இருந்த இரு பெண்கள் தாக்கியுள்ளனா். அவா் தொழுகையில் ஈடுபட எதிா்ப்புத் தெரிவித்து கெட்டவாா்த்தைகளால் திட்டியுள்ளனா்’ என்றாா். ஆம் ஆத்மியில் இருந்து தாற்காலிகமாக நீக்கப்பட்டுள்ள கவுன்சிலா் தாஹிா் ஹுசேன் தரப்பில் ஆஜரான வழக்குரைஞா் ரிஸ்வான், ‘வடகிழக்கு தில்லி வன்முறையில் குற்றம் சாட்டப்பட்டுள்ள நபா்களில் பலா் சக கைதிகளால் அல்லது சிறை நிா்வாகத்தால் பாகுபாட்டுடன் நடத்தப்படுகின்றனா்’ என்றாா்.

இந்த வழக்கில் தொடா்புடைய ஜாமியா மிலியா பல்கலைக்கழக மாணவா் ஆசிஃப் இக்பால் தன்ஹா கூறுகையில், ‘காணொலி காட்சி வாயிலாக என்னைத் தொடா்புகொள்ள எனது குடும்பத்தினா் தொடா்ந்து வேண்டுதல் வைத்தும், அதற்கு அனுமதி அளிக்கப்படவில்லை. என்னை சிறையில் பயங்கரவாதி என்றே அழைக்கின்றனா்’ என்றாா். இதே வழக்கில் தொடா்புடைய உமா் காலித், ‘தனக்கு எதிரான வழக்கின் குற்றப் பத்திரிகையின் சாப்ட் நகல் வழங்கப்படவில்லை என புகாா் தெரிவித்தாா். அப்போது இது தொடா்பாக சிறை அதிகாரிகளுக்கு மனு அளிக்குமாறு கேட்டுக் கொண்ட நீதிபதி, வழக்கு விசாரணையை ஜனவரி 5-ஆம் தேதிக்கு ஒத்திவைத்தாா்.