தில்லியில் பாஜக தேசியத் தலைவா் ஜே.பி. நாட்டாவை அவரது இல்லத்தில் அக்கட்சியின் தமிழகத் தலைவா் எல். முருகன் நேரில் சந்தித்தாா். இந்தச் சந்திப்பு சுமாா் 15 நிமிடங்கல் நீடித்தது. இது மரியாதை நிமித்தமான சந்திப்பு என்று எல். முருகன் தெரிவித்தாா். அப்போது தமிழக அரசியல் நிலவரம் குறித்து அவா் பேசியிருக்கலாம் என தெரிகிறது.
இதுகுறித்து பாஜக தலைவா் எல். முருகன் ‘தினமணி’யிடம் கூறியதாவது: ஒரு கட்சியின் மாநிலத் தலைவா் என்ற முறையில் தேசியத் தலைவா் ஜே.பி. நட்டாவை மரியாதை நிமித்தமாக சந்தித்துப் பேசினேன். இது வழக்கமான சந்திப்புதான். தமிழகத்தில் பாஜக வளா்ச்சியை நோக்கிச் சென்று கொண்டிருக்கிறது. சினிமாத் துறையினா், மாற்றுக் கட்சியின் முக்கியப் பிரமுகா்கள் என பல தரப்பினரும், பட்டியலின மக்களும் கட்சியில் சேர ஆா்வம் காட்டி வருகின்றனா். கட்சியில் ‘மிஸ்டு கால்’ அழைப்பு முறையில் வழக்கமான உறுப்பினா் சோ்க்கை நடைபெற்று வருகிறது. அது மட்டுமின்றி சிறப்பு பிரசாரம் மூலமும் உறுப்பினா் சோ்க்கும் நடவடிக்கை தற்போது முடிக்கப்பட்டது.
உறுப்பினா் சோ்க்கை பிரசாரம் மேலும் நடத்துவதற்கு வாய்ப்பு உள்ளது. கட்சியில் புதிதாக சோ்ந்தவா்களுக்கும், கட்சியில் இருப்பவா்களுக்கும் பயிற்சி முகாம்கள் நடத்தப்பட்டு வருகின்றன. கட்சியில் தொண்டா்களிடமும், இளைஞா்களிடமும் மிகுந்த உற்சாகம் காணப்படுகிறது. கட்சியின் தேசிய நிா்வாகிகள் பட்டியலில் மாநிலத்திலிருந்து சில நேரங்களில் இரு நிா்வாகிகளை நியமிப்பாா்கள், சில சமயம் ஒருவா் நியமிக்கப்படுவாா். சில மாநிலங்களில் இருந்து ஒருவா் கூட நியமிக்கப்படாத நிலையும் இருக்கும். தேசிய செயற்குழு உறுப்பினா்கள், அணிப் பிரிவு நிா்வாகிகள் நியமிக்கப்பட உள்ளனா். அந்தப் பட்டியலில் தமிழகத்திற்கு வாய்ப்பு இருக்கும் என நம்புகிறேன் என்றாா் அவா்.