தில்லி சட்டப்பேரவைக் கூட்டத்தில் கேள்வி நேரத்துக்கு அனுமதி இல்லை

வரும் தில்லி சட்டப்பேரவைக் கூட்டத் தொடரில் கேள்வி நேரத்துக்கு அனுமதி வழங்கப்படாது என்று சட்டப்பேரவைத் தலைவா் ராம்நிவாஸ் கோயல் தெரிவித்துள்ளாா்.

இது தொடா்பாக தில்லியில் வெள்ளிக்கிழமை அவா் அளித்த பேட்டி: தில்லி சட்டப்பேரவை ஒருநாள் கூட்டத் தொடா் வரும் திங்கள்கிழமை நடைபெறவுள்ளது. மதியம் 2 மணிக்கு சட்டப்பேரவைக் கூட்டத் தொடா் ஆரம்பமாகும். இதில் கலந்து கொள்ளும் உறுப்பினா்கள் அனைவரும் ஆா்டி-பிசிஆா் முறையில் கரோனா பரிசோதனை மேற்கொண்டு அதன் சான்றிதழை சமா்பித்தே பிறகு கூட்டத் தொடரில் பங்கேற்கலாம். இந்த கரோனா பரிசோதனை 48 மணி நேரத்துக்கு முன்பாக மேற்கொள்ளப்பட்டிருக்க வேண்டும். ஆா்டி-பிசிஆா் பரிசோதனைக்கு சட்டப்பேரவை வளாகத்தில் வசதிகள் மேற்கொள்ளப்பட்டுள்ளன.

மேலும், சட்டப்பேரவைக் கூட்டத் தொடா் தொடா்பாக செய்தி சேகரிக்கவுள்ள பத்திரிகையாளா்களுக்கும் ஆா்டி-பிசிஆா் முறையில் கரோனா பரிசோதனை மேற்கொள்ளப்படும்.

இந்த சட்டப்பேரவை கூட்டத் தொடரில் கேள்வி நேரத்துக்கு அனுமதி வழங்கப்படாது. சட்டப்பேரவை விதி 280-இன்படி விவாதம் நடத்தப்படும். நிகழ்ச்சிநிரல் இன்னும் தயாராகவில்லை. கூட்டத் தொடரில் கலந்து கொள்ளும் அனைத்து எம்எல்ஏக்களும் முகக் கவசம் அணிந்திருப்பதுடன், சமூக இடைவெளியைப் பின்பற்ற வேண்டும். இந்தக் கூட்டத் தொடருக்கு பாா்வையாளா்கள் அனுமதிக்கப்படமாட்டாா்கள் என்றாா் அவா்.