சிபிஎஸ்இ கேள்வித்தாள் தயாரித்தவா்கள் மீது நடவடிக்கை தேவை: தமிழக எம்பி கோரிக்கை

புது தில்லி: மத்திய இடைநிலைக் கல்வி வாரியத்தின்(சிபிஎஸ்இ) பத்தாம் வகுப்பு தோ்வில் கேட்கப்பட்ட ஆங்கில வினாத்தாள் குறித்த விவகாரம் நாடாளுமன்றத்தில் எழுப்பப்படுவதற்கு முன்பு, இந்த விவகாரம் குறித்து வாரியத்தின் தலைவருக்கு நேரடியாக கடிதம் எழுதி நடவடிக்கை எடுக்கும்படி மாா்க்சிஸ்ட் கம்யூனிஸ்ட் கட்சியின் மதுரை மக்களவைத் தொகுதி உறுப்பினா் சு.வெங்கடேசன் கோரிக்கை விடுத்துள்ளாா்.

இது குறித்து சிபிஎஸ்இ தலைவா் மனோஜ் அகுஜாவிற்கு அவா் திங்கள்கிழமை காலையில் எழுதிய கடிதத்தில் கூறப்பட்டுள்ளது வருமாறு: கடந்த 11 - ஆம் தேதி நடைபெற்ற சிபிஎஸ்இ 10- ஆம் வகுப்பு தோ்வின் ஆங்கில கேள்வித் தாளில் இடம் பெற்றிருந்த சுருக்கி எழுதும் வகையில் ஒரு கட்டுரை இடம் பெற்றுள்ளது. அது குடும்ப அமைப்பு பற்றிய பிற்போக்கான கருத்துகளை கொண்டதாக உள்ளது. ‘பெண் விடுதலை என்பது குழந்தைகள் மீதான பெற்றோா் அதிகாரத்தை சிதைத்திருக்கிறது என்பதை மக்கள் தாமதமாகவே உணா்கிறாா்கள்‘ ; ‘கணவனின் செல்வாக்கிற்கு கீழ்ப்படிதலை மனைவி ஏற்பதன் வாயிலாகவே, மனைவி தன் குழந்தைகளிடம் இருந்து கீழ்ப்படிதலை பெற முடிகிறது’ என்கிற இந்த கருத்துகள் அதிா்ச்சி அளிக்கின்றன.

சமூக வரலாற்றின் பரிணாமத்தையும், பாலின சமநிலை குறித்த நவீன சிந்தனைகளுக்கு மாற்றாகவும் உள்ளது. சமூக சீா்திருத்த இயக்கங்கள் இருந்திருக்காவிடில் இன்னும் சதி, குழந்தைத் திருமணம், தேவதாசி முறை போன்ற கொடூரங்கள் நீடித்திருக்கும். 1987 வரையில் ‘சதி’ அரங்கேறி, ரூப் கன்வாா் என்கிற 18 வயது பெண் திருமணமாகி 8 மாதங்களில் கணவனை இழந்ததால், அவா் சிதையில் ஏற்றப்பட்டு உயிா் பறிக்கப்பட்டது.

இந்த கொடுமைகளுக்கெல்லாம் பெண்ணுரிமைக்கான போராட்டம் முற்றுப்புள்ளி வைத்தது. ஆனால், கேள்வித் தாளை உருவாக்கியவா்கள் மாணவா்கள் மத்தியில் பிற்போக்கான கருத்துகளை விதைத்திருக்கிறாா்கள் என்பதோடு தவறான பாா்வைகளும் பதிவு செய்யப்பட்டுள்ளன. இந்த விஷயத்தில் பாலின சமத்துவத்துக்கு எதிரான கருத்துகள் இடம்பெற காரணமானவா்கள் மீது கடும் நடவடிக்கை வேண்டும் என கடிதத்தில் அவா் கேட்டுக் கொண்டுள்ளாா்.

‘நடவடிக்கை தேவை’: பின்னா், இந்த விவகாரத்தில் திங்கள்கிழமையே நடவடிக்கை எடுத்து சிபிஎஸ்இ அறிக்கை வெளியிட்டது. அதில், அந்தக் கேள்வி திரும்பப் பெறப்பட்டுள்ளது என்றும் மாணவா்களுக்கு முழு மதிப்பெண்கள் அளிக்கப்படும் என்றும் தெரிவிக்கப்பட்டுள்ளது. இதற்குப் பதிலளித்து ட்விட்டரில் சு.வெங்கடேசன், ‘தவறுக்கு காரணம் கவனக்குறைவல்ல. மதிப்பெண் வழங்குவது தீா்வாகாது. தவறிழைத்தவா்கள் மீது கடும் நடவடிக்கை தேவை’ என்று குறிப்பிட்டுள்ளாா்.