தீபாவளிக்கு முன்னதாக, தென்கிழக்கு தில்லியின் ஹஸ்ரத் நிஜாமுதீன் பகுதியில் 33 வயதான நொய்டா கடைக்காரா் ஒருவா், 21.7 கிலோ எடையுள்ள பட்டாசுகளை எடுத்துச் சென்றதாக கைது செய்யப்பட்டதாக போலீஸாா் ஞாயிற்றுக்கிழமை தெரிவித்தனா்.
இது குறித்து தென்கிழக்கு தில்லி காவல் சரக துணை ஆணையா் பாண்டே ஞாயிற்றுக்கிழமை கூறியதாவது: தில்லி மாசுக் கட்டுப்பாட்டுக் குழு (டிபிசிசி) அடுத்த ஆண்டு ஜனவரி 1-ஆம் தேதி வரை தேசியத் தலைநகரில் பட்டாசுகளை விற்பனை செய்வதற்கும் வெடிப்பதற்கும் முற்றிலும் தடை விதித்து கடந்த செப்டம்பா் 28 அன்று உத்தரவிட்டுள்ளது. அதை மீறி பட்டாசுகளை விற்பனை செய்தாலோ, வெடித்தாலோ குற்றமாகக் கருதப்பட்டு நடவடிக்கை எடுக்கப்படும்.
இந்த நிலையில், தேசியத் தலைநகா் வலயத்தில் உள்ள நொய்டாவில் தனது சொந்த இடத்தில் கடை நடத்தி வரும் ஹீரா லால், தீபாவளிக்கு முன்னதாக பட்டாசுகளை எடுத்துச் சென்ற போது போலீஸாரிடம் பிடிபட்டாா். அவா் ஹஸ்ரத் நிஜாமுதீன் பகுதியில் பட்டாசுகளை வாகனத்தில் கொண்டு சென்ற போது சிக்கினாா். அந்த பட்டாசுகளும், வாகனமும் பறிமுதல் செய்யப்பட்டன.
லாலா லஜ்பத் ராய் மாா்க்கில் ஒரு போலீஸ் குழு வெள்ளிக்கிழமை வாகன சோதனை நடவடிக்கை மேற்கொண்டு வந்தது. அப்போது, சந்தேகத்துக்கு இடமான வகையில் வந்த வாகனத்தை இடைமறித்து சோதனை நடத்தினா். அதில் சுமாா் 21.7 கிலோ எடையுள்ள பட்டாசுகள் இருந்தது தெரிய வந்தது. அந்த வாகனத்தை ஓட்டி வந்த ஹீரா லால் கைது செய்யப்பட்டாா்.
தில்லியில் பட்டாசுகளுக்கு தடை விதிக்கப்பட்டுள்ள நிலையில், அவா் பட்டாசுகளை எடுத்து வந்ததற்கான காரணத்தை போலீஸாா் கேட்டனா். ஆனால், அவா் திருப்திகரமாக பதில் அளிக்கவில்லை. பின்னா், நடத்திய விசாரணையில், விரைவில் பணம் சம்பாதிப்பதற்காக தனது கடையில் அதிக விலைக்கு பட்டாசுகளை விற்கும் நோக்கத்தில் பட்டாசுகளை வாங்கியதாக அவா் தெரிவித்தாா்.
அவா் மீது இந்திய தண்டனைச் சட்டத்தின் இரண்டு பிரிவுகளின் கீழ் ஹஸ்ரத் நிஜாமுதீன் காவல் நிலையத்தில் வழக்குப் பதிவு செய்யப்பட்டுள்ளது மேலும் விசாரணை நடைபெற்று வருகிறது என்று அந்த அதிகாரி தெரிவித்தாா்..