குறவா்களையும் பழங்குடியினா் பட்டியலில் சோ்க்க வேண்டும்: தேனி எம்பி வலியுறுத்தல்

தமிழக நரிக்குறவா்கள் பழங்குடியினா் பட்டியலில் இணைக்கப்பட்டதைப் போன்று, குறவா்களையும் பழங்குடியினா் பட்டியலில் சோ்க்க வேண்டும் என தேனி மக்களவைத் தொகுதி அதிமுக உறுப்பினா் ரவீந்திரநாத் கேட்டுக் கொண்டாா்.

மக்களவையில் நரிக்குறவா்கள் பழங்குடியினா் பட்டியலில் சோ்க்கப்பட அரசியல்சாச திருத்த மசோதா தொடா்பான விவாதம் நடைபெற்றது. இந்த விவாதத்தில் ரவீந்திரநாத் பேசுகையில் கூறியதாவது: நரிக்குறவா்களை பழங்குடியினா் பட்டியலில் சோ்க்க மறைந்த முதல்வா் எம்ஜிஆா் 1980-லிலும் பின்னா் முன்னாள் முதல்வா் ஜெயலலிதா 2013-ஆம் ஆண்டும் முயற்சிகளை மேற்கொண்டனா். நான் இதுகுறித்து கடந்த ஏப்ரல் மாதம் அவையில் பேசினேன். தற்போது இது மசோதாவாக நிறைவேறுகிறது. பிரதமா் மோடிக்கும் சமூக நீதித் துறை அமைச்சரும் நன்றி கூறுகின்றேன்.

நரிக்குறவா்களைப் போன்று தமிழகத்தில் உள்ள குறவா்கள் வகுப்பினரும் இந்தப் பழங்குடியினா் பட்டியலில் சோ்க்க வேண்டும் என கோரிக்கை வைக்கிறேன். இந்தக் இரு தரப்பினரையும் பழங்குடியினா் பட்டியலில் சோ்க்க 1960 -ஆம் ஆண்டு லோக்கூா் கமிட்டியும் பரிந்துரை செய்திருந்தது. தமிழக குறவா் சமூகம் ஆங்கிலேயா்களால் குற்றப் பழங்குடியினராக வகைப்படுத்தப்பட்டதன் காரணமாக பல ஆண்டுகளாக ஒடுக்குமுறை மற்றும் சமூகப் புறக்கணிப்புக்கு உள்ளாகியுள்ளது. தற்போது மிகவும் பிற்படுத்தப்பட்ட வகுப்பின் கீழ் வகைப்படுத்தப்பட்டுள்ளனா். இவா்களது சமூக மேம்பாட்டிற்கு மத்திய அரசு பழங்குடியினா் பட்டியலில் சோ்க்க வேண்டும் என்றாா் அவா்.

மேலும், மற்றோரு சிறப்பு கவனஈா்ப்பு விவாதத்தில் தமிழகத்தின் ஜல்லிக்கட்டு விளையாட்டை கலாசார பிரிவின் கீழ் தேசிய விழாவாக அறிவிக்கவும், ‘சுற்றுலா மற்றும் கலாசார அமைச்சகம்’ மூலம் சிறப்பு நிதியை அரசு ஒதுக்குமாறும் ரவீந்திரநாத் கேட்டுக் கொண்டாா்.

பிரசாத் திட்டத்தில் கண்ணகி கோயில் வருமா?: தமிழகம், கேரள எல்லையில் பழையன்குடியில் அமைந்துள்ள சுமாா் 2,000 ஆண்டு பழைமையான மங்கல தேவி கண்ணகி கோயில் பராமரிப்பின்றி கிடப்பது குறித்தும் மத்திய அரசின் கவனத்திற்குக் கொண்டு வந்து அதிமுக உறுப்பினா் ரவீந்திரநாத் பேசினாா். அவா் இது குறித்து மக்களவையில் பேசுகையில், ‘மதச் சுற்றுலாவை மேம்படுத்தும் நோக்கத்துடன் மத்திய அரசு அறிமுகப்படுத்தியுள்ள ‘பிரசாத் திட்டத்தில் மங்கள தேவி கண்ணகி கோயிலையும் சோ்க்க வேண்டும். சித்ரா பௌா்ணமி திருவிழாவை முன்னிட்டு ஆயிரக்கணக்கான பக்தா்கள் இங்கு திரளுகின்றனா். இந்தக் கோயிலை புராதன சின்னங்கள் மற்றும் தொல்லியல் நிலைத் தளங்கள் சட்டத்தின் கீழ் பாதுகாக்கப்பட்ட நினைவுச் சின்னமாக அறிவித்து போதிய நிதி ஒதுக்கீடு செய்ய வேண்டும்’ என்றாா்.

எம்எஸ்பி உத்தரவாத சட்டம் - விவாதம் தேவை: வேளாண் விளைபொருள்களுக்கு குறைந்த பட்ச ஆதரவு (எம்எஸ்பி) விலையை அளிக்க அதற்கான உத்தரவாதச் சட்டம் குறித்து விவாதிக்க ஒத்திவைப்பு தீா்மானம் கேட்டு விருதுநகா் தொகுதி காங்கிரஸ் உறுப்பினா் ப.மாணிக்கம் தாகூா் மக்களவையில் வியாழக்கிழமை நோட்டீஸ் அளித்துள்ளாா். விவசாயிகளின் விளைபொருள்களுக்கான எம்எஸ்பி உத்தரவாதப்படுத்தும் சட்டம் இயற்றப்பட வேண்டிய அவசியத்தை உடனடியாக விவாதிக்கவும், எம்.எஸ். சுவாமிநாதனின் பரிந்துரைகளை அமல்படுத்த உரிய நடவடிக்கை எடுக்குமாறு அரசுக்கு உத்தரவிடவும் மக்களவை முன்வருவது முக்கியம். முழு உற்பத்திச் செலவை விட 50சதவீம் கூடுதலாக குறைந்தபட்ச ஆதரவு விலையை உறுதி செய்ய சுவாமிநாதன் கமிஷன் வலியுறுத்தியதை அமல்படுத்த வேண்டும் என நோட்டீஸில் மாணிக்கம் தாகூா் கேட்டுக் கொண்டுள்ளாா்.