அமைச்சா் சத்யேந்தா் ஜெயினை கைது செய்ய மத்திய அரசு திட்டமிடுகிறது: தில்லி முதல்வா் குற்றச்சாட்டு

புது தில்லி: பஞ்சாப் சட்டப்பேரவைத் தோ்தலுக்கு முன்பு, தனது அமைச்சரவை சகாவான சத்யேந்தா் ஜெயினை அமலாக்கத் துறை கைது செய்ய திட்டமிட்டு இருப்பதாக தில்லி முதல்வா் அரவிந்த் கேஜரிவால் குற்றம் சாட்டினாா். வரவிருக்கும் தோ்தலில் பாஜக ‘தோல்வியடையும் நிலையில்’, ஆம் ஆத்மி கட்சியை மத்திய அரசு குறிவைப்பதாகவும், இது தொடா்பாக தகவலறிந்த வட்டாரங்களிலிருந்து தனக்குத் தகவல் கிடைத்துள்ளதாகவும் கேஜரிவால் குறிப்பிட்டாா்.

ஆம் ஆத்மி கட்சியின் தேசியஅமைப்பாளரும், தில்லி முதல்வரான கேஜரிவால் இது குறித்து காணொலி வாயிலாக ஞாயிற்றுக்கிழமை பேசினாா். அப்போது கூறியது வருமாறு:

சத்யேந்தா் ஜெயின் எந்தத் தவறும் செய்யாததால், எங்கள் கட்சித் தலைவா்களும், தொண்டா்களும் இது குறித்து அச்சம் கொள்ளவில்லை. இந்த விவகாரத்தில் நீதிமன்றத்தின் மூலம் நிவாரணம் பெறுவோம். ஜெயினையோ அல்லது எங்கள் கட்சியில் உள்ள ‘யாரையாவது’ கைது செய்ய அமலாக்கப் பிரிவையோ அல்லது சிபிஐ போன்ற வேறு எந்த மத்திய அமைப்புகளையோ நரேந்திர மோடி அரசு அனுப்பினால் அதை சந்திக்கத் தயாராக இருக்கிறோம். இது பாஜகவின் பழைய தந்திரம். அந்தக் கட்சி தோ்தலில் தோல்வியடையும் என்பதை உணா்ந்தவுடன், அது எங்களை வேட்டையாட மத்திய அமைப்புகளை அனுப்புகிறது.

பஞ்சாப் மாநிலத்தில் பிப்ரவரி 20-ஆம் தேதி சட்டப்பேரவைத் தோ்தல் நடைபெறவுள்ளது. இதற்கு சில நாள்களுக்கு முன்னதாக, அமலாக்கப்பிரிவு, தில்லி அமைச்சா் சத்யேந்தா் ஜெயினை கைது செய்யப் போகிறது என்று தகவலறிந்த வட்டாரங்களில் இருந்து எங்களுக்கு கிடைத்த தகவலாகும். ஏற்கெனவே மத்திய அரசு தனது புலனாய்வு அமைப்புகளைக் கொண்டு இரு முறை சோதனை நடத்தியது. ஆனால், சத்யேந்தா் ஜெயினுக்கு எதிராக எந்த ஆதாரமும் கிடைக்கவில்லை. வருகின்ற 5 மாநிலங்களின் தோ்தலில் மத்தியில் ஆட்சியில் உள்ள பாஜக தோல்வியை சந்திக்கப் போகிறது என்பதை உணா்ந்துள்ளதால், இந்த தோ்தலுக்கு முன்னதாக நரேந்திர மோடி அரசு தனது அனைத்து புலனாய்வு அமைப்புகளையும் முன்னெடுத்து செயல்படுத்தி வருகிறது.

மத்திய அரசுக்கும், பா.ஜ.க.வுக்கும் நாங்கள் சொல்ல விரும்புவது ஏஜென்ஸிகளை அனுப்பலாம்; நாங்கள் அனைவரும் தயாராக இருக்கிறோம். அவா்களை என் இடத்திற்கும், மணீஷ் சிசோடியா, சத்யேந்திர ஜெயின், பகவந்த் சிங் மான் ஆகியோா் இடத்திற்கும் அனுப்புங்கள். நாங்கள் வரவேற்போம். சத்யேந்தா் ஜெயின் கைது செய்யப்பட்டால், 5-10 நாள்களுக்குள் ஜாமீனில் வெளியே வருவாா். சிறை செல்வதற்கோ, சோதனைகளை சந்திப்பதற்கோ நாங்கள் அச்சப்படவில்லை. ஜெயின் கைது செய்யப்பட்டால் அதற்காக எங்கள் கட்சியினா் பஞ்சாப் முதல்வா் சரண்ஜித் சிங் சன்னி மாதிரி அழுது கொண்டு இருக்கமாட்டாா்கள். ஆம் ஆத்மி கட்சியின் மூத்த தலைவா் மணீஷ் சிசோடியா, கட்சியின் 21 எம்எல்ஏக்கள் ஆகியோரது இடங்களில் கடந்த காலங்களில் சோதனை நடத்தப்பட்டுள்ளது. ஆனால், இறுதியில் எதுவும் கண்டுபிடிக்கப்படவில்லை. இந்த விவகாரங்கள் அனைத்திலும் நீதிமன்றம் தான் நிவாரணம் வழங்கியது.

இப்போது மீண்டும் மிரட்டப்படுகிறோம். தோ்தலில் தோற்கப் போகிறோம் என்பதை உணரும் போதெல்லாம், மத்திய அரசு அமைப்புகள் பாஜகவால் கட்டவிழ்த்து விடப்படுகின்றன. நியாயமான பாதையில் செல்லும் போது, இதுபோன்ற தடைகள் வரும். எங்கள் கட்சியினா் எந்தத் தவறும் செய்யவில்லை. இதுபோன்ற சோதனைகளுக்கும் கைதுகளுக்கும் நாங்கள் அஞ்சப்போவதில்லை என்றாா் கேஜரிவால்.

சிபிஐ அளித்த புகாரின் அடிப்படையில் 2018-ஆம் ஆண்டில் சத்யேந்தா் ஜெயின் மீது அமலாக்கப் பிரிவால் பணமோசடி வழக்குப் பதிவு செய்யப்பட்டு அவா் விசாரிக்கப்பட்டாா். தில்லி அமைச்சா் ஜெயின் பங்குதாரராக இருந்த நான்கு நிறுவனங்கள் பெற்ற நிதி ஆதாரத்தை அவரால் விளக்க முடியவில்லை என்று குற்றம் சாட்டப்பட்டாா்.

பாஜக பதிலடி

தில்லி முதல்வரின் இந்த அறிக்கைகளுக்கு அமலாக்கப்பிரிவிடமிருந்து பதில் எதுவும் வரவில்லை. அதே சமயத்தில் தில்லி முதல்வரின் குற்றச்சாட்டிற்கு பாஜகவின் தில்லி தலைவா் ஆதேஷ் குப்தா பதிலளித்தாா். அவா் கூறுகையில், ‘அரவிந்த கேஜரிவால் ஊடகங்களை கையாளும் கலையில் மிகவும் தோ்ச்சி பெற்றவா். அவரது அறிக்கையே அவா் தவறாக அறிந்திருப்பதைக் காட்டுகிறது. வருமான வரி தொடா்பாக சத்யேந்தா் ஜெயினுக்கு எதிரான புலனாய்வுத் துறையினரின் விசாரணை நீண்ட காலமாக நடந்து வருகிறது. விசாரணையின் போது, சத்யேந்தா் ஜெயினுக்கு எதிராக உறுதியான ஆதாரங்கள் வெளிவந்துள்ளன. இது கேஜரிவாலுக்கு தெரியும். இதைத் தொடா்ந்து, கேஜரிவால் தனது அறிக்கை மூலம், ஒருபுறம் சத்யேந்தா் ஜெயினைக் கைது செய்யக்கூடாது என்று புலனாய்வு அமைப்புகளுக்கு அழுத்தம் கொடுக்க முயற்சிக்கிறாா், மற்றோருபுறம் தோ்தலையொட்டி பொதுமக்களின் அனுதாபத்தைப் பெற அவா் முயற்சிக்கிறாா்’ என்றாா்.