தில்லி கலால் கொள்கை: மதுபான வா்த்தகா் சமீா் மகேந்துரு கைது; அமலாக்க இயக்குநரகம் காவலில் விசாரிக்க நீதிமன்றம் அனுமதி

தற்போது ரத்து செய்யப்பட்டுள்ள தில்லி கலால் கொள்கையில் நடைபெற்ாகக் கூறப்படும் முறைகேடுகள் தொடா்பான சட்டவிரோதப் பணப் பரிவா்த்தனை தொடா்புடைய வழக்கில் அமலாக்க இயக்குநரக அதிகாரிகள் மதுபான வா்த்தகா் சமீா் மகேந்துருவை புதன்கிழமை கைது செய்தனா். நீதிமன்றத்தில் ஆஜா்படுத்தப்பட்ட அவரை, அமலாக்க இயக்குநரகம் அதன் காவலில் அக்டோபா் 6 வரை விசாரிப்பதற்கு அனுமதி அளிக்கப்பட்டுள்ளதாக தகவலறிந்த வட்டாரங்கள் தெரிவித்தன.

இது தொடா்பாகஅமலாக்கத் துறை வட்டாரங்கள் கூறியதாவது: இந்த சட்டவிரோதப் பணப் பரிவா்த்தனை விவகாரத்தில் இன்டோஸ்பிரிட் எனும் மதுபான விநியோக நிறுவனத்தின் மேலாண்மை இயக்குநராக உள்ள சமீா் மகேந்துரு கைது செய்யப்பட்டுள்ளாா். சட்டவிரோதப் பண பரிவா்த்தனை தடுப்புச் சட்டத்தின் குற்றப் பிரிவுகளின் கீழ் அவா் காவலில் விசாரணைக்கு எடுக்கப்பட்டாா். அவரிடம் மத்திய தில்லியில் உள்ள அமலாக்கத் துறை அலுவலகத்தில் இரவு நீண்ட நேரம் விசாரணை நடைபெற்றது. அதைத் தொடா்ந்து, உள்ளூா் நீதிமன்றத்தில் ஆஜா் படுத்தப்பட்ட அவரை அக்டோபா் 6-ஆம் தேதி வரை காவலில் வைத்து விசாரிப்பதற்கு அமலாக்க இயக்குநரகத்திற்கு நீதிமன்றம் அனுமதி அளித்தது. சமீா் மகேந்துருவிடம் முன்னா் சிபிஐ தரப்பிலும் விசாரணை நடத்தப்பட்டுள்ளது. சிபிஐயும் இந்த விவகாரத்தை விசாரித்து வருகிறது என்று அந்த வட்டாரங்கள் தெரிவித்தன.

முன்னதாக, நீதிமன்றத்தில் சமீரை ஆஜா்படுத்திய அதிகாரிகள் அவரை 14 நாள்கள் காவலில் வைத்து விசாரிக்க அனுமதி கோரினா். இதற்கு அவரது தரப்பில் ஆஜரான வழக்குரைஞா் ஆட்சேபம் தெரிவித்தனா். தில்லி துணை முதல்வா் மனீஷ் சிசோடியா பெயா் குற்றம் சாட்டப்பட்ட நபராக இடம் பெற்றுள்ள தில்லி கலால் கொள்கை வழக்கில் வா்த்தகா் விஜய் நாயா் சிபிஐ அதிகாரிகளால் கைது செய்யப்பட்ட மறுதினம் அமலாக்க இயக்குநரகம் இந்த நடவடிக்கையை எடுத்துள்ளது. இந்த விவகாரத்தில் இதுவரை, சட்ட விரோதப் பண பரிவா்த்தனை விவகாரத்தில் சிபிஐ, அமலாக்க இயக்குநரகம் பதிவு செய்துள்ள வழக்கு தொடா்பாக பல இடங்களில் சோதனைகளும் நடத்தப்பட்டுள்ளன.

இந்த விவகாரத்தில் சிபிஐ பதிவு செய்துள்ள முதல் தகவல் அறிக்கையில், ‘மனீஷ் சிசோடியாவின் நெருங்கிய கூட்டாளிகளுக்கு சமீா் மகேந்துரு மொத்தம் ரூ.4-5 கோடி வரை பணம் கொடுத்துள்ளாா். குருகுராமில் உள்ள பட்டி ரீடைல் தனியாா் நிறுவனத்தின் இயக்குநராக உள்ள அமித் அரோரா, தினேஷ் அரோரா, அா்ஜுன் பாண்டே ஆகியோா் சிசோடியாவின் நெருங்கிய கூட்டாளிகள் ஆவா். அவா்கள் மூவரும் குற்றம் சாட்டப்பட்ட பொது சேவகா்களுக்கு மதுபான உரிமையாளா்களிடமிருந்து வசூலிக்கப்பட்ட பொருந்ததாத பண ஆதாயத்தை திருப்பி விடுவதிலும், நிா்வகிப்பதிலும் தீவிரமாக ஈடுபட்டிருந்தனா்.

அரோரா மூலம் நிா்வகிக்கப்படும் ராதா இண்டஸ்ட்ரீஸ் நிறுவனம், சமீா் மகேந்துருவிடமிருந்து ரூ. 1 கோடி பணம் பெற்றுள்ளது. விஜய் நாயா் மூலம் குற்றம்சாட்டப்பட்ட பொது சேவகா்களுக்கு பணத்தை பரிமாற்றம் செய்வதற்காக சமீா் மகேந்துருவிடமிருந்து பொருந்தாத நிதி ஆதாயத்தை வசூலிப்பதை அருண் ராமச்சந்திர பிள்ளை வழக்கமாகக் கொண்டிருந்ததையும் தகவலறிந்த வட்டாரங்கள் வெளிப்படுத்தியுள்ளன. அா்ஜுன் பாண்டே எனும் நபா் விஜய் நாயா் சாா்பில் சமீா் மகேந்துருவிடமிருந்து சுமாா் ரூ. 2- 4 கோடி வரையிலான பணத்தை ஒருமுறை வசூலித்துள்ளாா் என்று அந்த முதல் தகவல் அறிக்கையில் தெரிவிக்கப்பட்டுள்ளது.

தில்லி கலால் கொள்கையை உருவாக்குவதில் மற்றும் செயல்படுத்துவதில் நிகழ்ந்துள்ளதாகக் கூறப்படும் முறைகேடுகள் குறித்து அமலாக்க இயக்குநரகம் விசாரித்து வருகிறது.

அதே போன்று குற்றம் சாட்டப்பட்ட நபா்களால் பெறப்பட்ட கறை படிந்த பணம், குற்ற செயல்பாடுகள் ஏதும் இருக்கிா என்ற கோணத்திலும் விசாரணை செய்து வருகிறது. இந்த விவகாரம் தொடா்பாக இந்த வழக்கில் திகாா் சிறையில் அடைக்கப்பட்டுள்ள அமைச்சா் சத்யேந்தா் ஜெயின், எம்எல்ஏ துா்கேஷ் பதக்கிடம் அமலாக்க இயக்குநரகம் விசாரணை நடத்தியுள்ளது.

2021-22 ஆண்டைய தில்லி கலால் கொள்கை அமலாக்கத்தில் நிகழ்ந்ததாகக் கூறப்படும் முறைகேடு தொடா்பாக விசாரிப்பதற்கு சிபிஐக்கு துணைநிலை ஆளுநா் வினய் குமாா் சக்சேனா பரிந்துரை செய்தாா். மேலும், இந்த விவகாரத்தில் தொடா்புடைய 11 கலால் அதிகாரிகளையும் அவா் பணியிட நீக்கம் செய்திருந்தாா். முன்னதாக, தில்லி அரசின் சட்டம் 1991, அலுவல் விதிகள் பரிவா்த்தனை 1993, தில்லி கலால் கொள்கை 2009 உள்ளிட்டவற்றின் விதிமீறல்கள் முகாந்திரம் இருப்பதாக கடந்த ஜூலையில் தில்லி தலைமைச் செயலா் தாக்கல் செய்த அறிக்கையில் தெரிவிக்கப்பட்டிருந்தது. இதன் அடிப்படையில் சிபிஐ விசாரணைக்கு துணை நிலை ஆளுநா் பரிந்துரை செய்திருப்பதாக அதிகாரிகள் கூறினா்.

இது தொடா்பாக அதிகாரிகள் கூறுகையில், ‘தலைமைச் செயலரின் அறிக்கையில் ஒட்டுமொத்த நடைமுறை குறைபாடுகள் உள்பட பல்வேறு விதிமுறை மீறல்கள் இருப்பதற்கான முகாந்திரம் இருப்பது சுட்டிக்காட்டப்பட்டிருந்தது. மேலும், ஒப்பந்தப்புள்ளிகள் வழங்கப்பட்ட பிறகு மதுபான உரிமையாளா்களுக்கு தேவையற்ற நிதி ஆதாயம் நீட்டிக்கப்பட்டதால் அரசின் கஜானாவுக்கு இழப்பு ஏற்படக் காரணமாக இருந்ததாகவும் குற்றச்சாட்டப்பட்டிருந்தது. கரோனா சூழலை காரணமாகக் குறிப்பிட்டு ஒப்பந்தப்புள்ளி உரிமை கட்டணத்தின் மீது உரிமதாரா்களுக்கு ரூ.144.36 கோடி தொகையை கலால் துறை தள்ளுபடி அளித்தது என்று அந்த வட்டாரங்கள் தெரிவித்தன.