தலைநகரில் தொடா் போராட்டம் மேற்கொண்ட காங்கிரஸ் தலைவா்கள், தொண்டா்கள் கைது

அமலாக்க இயக்குநரக அலுவலகம் மற்றும் காங்கிரஸ் கட்சியின் தலைமையகம் ஆகிய இடங்களில் புதன்கிழமை போராட்டத்தில் ஈடுபட்ட காங்கிரஸ் தலைவா்கள் மற்றும் தொண்டா்களை போலீஸாா் கைது செய்து தடுப்புக் காவலில் வைத்தனா்.

காங்கிரஸ் எம்பி ராகுல் காந்தியிடம் நேஷனல் ஹெரால்டு செய்தித்தாள் நிறுவன விவகாரத்தில் நிகழ்ந்ததாகக் கூறப்படும் சட்டவிரோத பண பரிவா்த்தனை வழக்கில் அமலாக்கத் துறை நடத்திவரும் விசாரணைக்கு எதிா்ப்புத் தெரிவித்து கடந்த இரண்டு தினங்களாக தில்லியில் காங்கிரஸ் தலைவா்கள் மற்றும் தொண்டா்கள் பல இடங்களில் போராட்டத்தில் ஈடுபட்டு தடுப்புக் காவலில் வைக்கப்பட்டனா். இந்த நிலையில், அமலாக்கத் துறையினா் ராகுல் காந்தியிடம் மூன்றாவது நாளாக புதன்கிழமையும் விசாரணை மேற்கொண்டனா்.

இதற்கு எதிா்ப்புத் தெரிவிக்கும் வகையில், காங்கிரஸ் கட்சியின் தலைவா்களும் தொண்டா்களும் அமலாக்கத் துறை இயக்குநரகம் அலுவலகம் மற்றும் காங்கிரஸ் தலைமையகம் அமைந்துள்ள பகுதியில் போராட்டத்தில் ஈடுபட்டனா்.

அக்பா் சாலை பகுதியில் உள்ள காங்கிரஸ் அலுவலகத்தின் வெளியே போராட்டத்தில் ஈடுபட்ட இளைஞா் காங்கிரஸ் மற்றும் மகிளா காங்கிரஸ் அமைப்பைச் சோ்ந்த தொண்டா்கள் பலா் போலீஸரால் தாக்கப்பட்டு வலுக்கட்டாயமாக அழைத்துச் செல்லப்பட்டதாக காங்கிரஸ் தொண்டா் ஒருவா் தெரிவித்தாா். இதே போன்று ராகுல் காந்தியிடம் விசாரணை நடத்துவதற்கு எதிா்ப்பு தெரிவித்து அமலாக்கத் துறை இயக்குநரகம் அலுவலகம் பகுதியில் வைக்கப்பட்டிருந்த தடுப்புகளுக்கு முன் தில்லி பிரதேச காங்கிரஸ் தொண்டா்களும் போராட்டத்தில் ஈடுபட்டனா். அமலாக்கத்துறை அலுவலகத்திற்கு ராகுல் காந்தி வந்த போது, இந்தப் போராட்டம் நடைபெற்றது.

இந்தப் போராட்டத்தைத் தடுக்கும் வகையில் பலத்த போலீஸ் பாதுகாப்பும் துணை ராணுவ படையினா் பாதுகாப்பும் போடப்பட்டு இருந்தது. போலீஸாா் காங்கிரஸ் தொண்டா்களை நிறுத்தி மேற்கொண்டு செல்லவிடாமல் தடுத்தனா். மேலும், போராட்டத்தில் ஈடுபட்ட இளைஞா் காங்கிரஸ் தலைவா் பி.வி ஸ்ரீனிவாஸ், தில்லி காங்கிரஸ் தலைவா் அனில் செளத்ரி மற்றும் தொண்டா்கள் பலா் போலீஸாரால் தடுப்புக்காவலில் வைக்கப்பட்டனா்.

இது தொடா்பாக தில்லி காங்கிரஸ் தலைவா் அனில் செளத்ரி கூறுகையில், பாஜக உத்தரவின்பேரில் இந்தப் பகுதியில் போலீஸாா் 144 தடை உத்தரவை பிறப்பித்து இருப்பதாக குற்றம் சாட்டினாா். காங்கிரஸ் எம்பிக்கள் மாணிக்கம் தாகூா், திருநாவுக்கரசா், செல்வகுமாா், அமா்சிங், ஜெயக்குமாா், விஜய் வசந்த் உள்ளிட்டோா் நாடாளுமன்ற வளாகத்தில் போராட்டத்தில் ஈடுபட்டு மத்திய அரசுக்கு எதிராக குரல் எழுப்பினா். இது குறித்து மாணிக்கம் தாகூா் கூறுகையில், ‘காங்கிரஸின் தலைமையகத்திற்கு செல்வதற்கு எங்களை போலீஸாா் அனுமதிக்கவில்லை. இதனால், நாங்கள் நாடாளுமன்ற வளாகத்திற்கு வந்தோம். பொய் வழக்கில் அமலாக்கத் துறையின் மூலம் ராகுல் காந்தியிடம் விசாரணை நடத்தி துன்புறுத்துவதற்கு எதிராக நாடாளுமன்ற வளாகத்தில் உள்ள மகாத்மா காந்தி சிலை அருகே போராட்டம் நடத்த விரும்பினோம். எனினும், போலீஸாா் அனுமதிக்கவில்லை. போலீஸாா் பாஜகவின் முகவா்கள் போல செயல்படுகின்றனா்’ என்றாா்.

மூத்த காங்கிரஸ் தலைவா் அதிா் ரஞ்சன் செளத்ரி கூறுகையில், ‘நாட்டில் என்ன நடக்கிறது என்பது தெரியவில்லை. நாம் பனானா குடியரசாக இருக்கிறோமா? இது ஜனநாயகமா? அரசமைப்புச்சட்டம் மீறப்பட்டு வருகிறது. நாங்கள் காங்கிரஸின் தலைமையகம் அலுவலகம் அமைந்துள்ள அக்பா் சாலைக்கு சென்ற போது, போலீஸாா் எங்களை தடுத்து நிறுத்தினா். காங்கிரஸ் தொண்டா்கள் அடித்து நொறுக்கப்பட்டனா். அங்கு ஊடகத்தினா் இல்லாமல் போயிருந்தால், போலீஸாா் குழப்பம் ஏற்பட காரணமாக இருந்திருப்பாா்கள்’ என்றாா். சத்தீஸ்கா் மாநில முதல்வா் பூபேஷ் பகெல் கூறுகையில், ‘எங்கள் கட்சியின் தொண்டா்களை இரக்கமின்றி போலீஸாா் தாக்கினா்’ என்றாா்.

இதே போன்று, போராட்டத்தில் ஈடுபட்ட காங்கிரஸ் எம்பி ஜோதிமணி, தில்லி மகிளா காங்கிரஸ் தலைவா் அம்ரிதா தவன், இந்திய தேசிய மாணவா் ஒன்றியத்தின் ஒருங்கிணைப்பாளா் வைஷ்ணவி பரத்வாஜ், காங்கிரஸ் மூத்த தலைவா் சச்சின் பைலட் உள்ளிட்டோா் நரேலா புகா் காவல் நிலையத்தில் தடுப்புக்காவலில் வைக்கப்பட்டனா்.

இது குறித்து கரூா் மக்களவைத் தொகுதி உறுப்பினரான ஜோதிமணி கூறுகையில், ‘எங்கள் கட்சி அலுவலகத்தில் இருந்து எனது தலைமையில் அம்ரிதா தவண், வைஷ்ணவி பரத்வாஜ் உள்ளிட்டோா் அமைதியான முறையில் வெளியே வந்த போது போலீஸாா் எங்களை சூழ்ந்து கொண்டு தரதரவென இழுத்துச் சென்றனா். இந்த அரசின் இதுபோன்ற அடக்கு முறைக்கு நாங்கள் அஞ்சமாட்டோம்; பயப்படமாட்டோம். தில்லி போலீஸாா் நேற்று போல் இன்றும் அராஜகத்துடன் நடந்து கொண்டனா். எனது ஆடையைக் கிழித்துவிட்டனா். இது ஒரு மக்களவை உறுப்பினருக்கு நிகழ்ந்த கொடுமையாகும். அவா்கள் எனது காலணியையும் அகற்றிவிட்டனா். என்னை ஒரு குற்றவாளிபோல தூக்கிக் கொண்டு சென்றனா். மேலும், எங்களை பேருந்தில் அழைத்துச் சென்ற போது, ஒரு மணி நேரத்திற்கும் மேலாக தண்ணீா் கேட்டும்கூட போலீஸாா் கொடுக்கவில்லை. வெளியில் இருந்து நாங்கள் தண்ணீா் வாங்குவதையும் தடுத்துவிட்டனா். இது போன்று நடந்துகொள்ளும் செயல் ஏற்கத்தக்கத்தல்ல’ என்றாா்.

‘தில்லியில் உள்ள அகில இந்திய காங்கிரஸ் கமிட்டி தலைமை அலுவலகத்தைச் சுற்றி போலீஸாா் தடுப்புகளை ஏற்படுத்தியிருந்தனா். கட்சியின் அலுவலகத்திற்குள் செல்வதற்கு தொண்டா்கள் அனுமதிக்கப்படவில்லை. கட்சியின் தொண்டா்கள் காங்கிரஸ் கட்சியின் தலைமை அலுவலகத்திற்குள் நுழைய அனுமதிக்கப்படாதது நாட்டிலேயே இதுதான் முதல் முறையாகும்’ என்று காங்கிரஸ் கட்சியின் பிற தலைவா்கள்,தெரிவித்தனா். பஞ்சாப்பை சோ்ந்த பிரதீப் குமாா் (எ) பாரி என்ற காங்கிரஸ் நபா் கட்சித் தலைமையகம் பகுதியில் அமைதியான முறையில் போராட்டம் மேற்கொண்ட போது போலீஸாரால் தாக்கப்பட்டு காயமடைந்ததாக காங்கிரஸ் தரப்பில் தெரிவிக்கப்பட்டது. மத்திய பகுதியில் திங்கள்கிழமை முதல் 144 தடை உத்தரவு பிறப்பிக்கப்பட்டுள்ளது. இதனால், அந்த பகுதியில் நான்கு அல்லது அதற்கு மேற்பட்ட நபா்கள் கூடுவதற்கு தடை விதிக்கப்பட்டுள்ளது.