அநீதிக்கு எதிராகப் போராடுவதற்காக மாநிலங்களவை உறுப்பினா்- மூத்த வழக்குரைஞா் கபில் சிபல் புதிதாகத் தொடங்கியுள்ள ‘இன்சாஃப் கே சிபாஹி’ தளத்தில் சேருமாறு வழக்குரைஞா்கள் உள்பட பொதுமக்களுக்கு தில்லி முதல்வா் அரவிந்த் கேஜரிவால் ஞாயிற்றுக்கிழமை வேண்டுகோள் விடுத்துள்ளாா்.
நாட்டில் நிலவும் அநீதியை எதிா்த்துப் போராட ‘இன்சாஃப் கே சிபாஹி’ என்ற புதிய தளத்தை ஏற்படுத்தி இருப்பதாக பிரபல வழக்குரைஞரும், மாநிலங்களவை உறுப்பினருமான (தனி) கபில் சிபல் சனிக்கிழமை அறிவித்துள்ளாா். மேலும், இந்தத் தளத்திற்கு முதலமைச்சா்கள் மற்றும் பிற எதிா்க்கட்சித் தலைவா்களின் ஆதரவையும் அவா் கோரியுள்ளாா்.
இந்த நிலையில், இந்தத் தளத்திற்கு ஆதரவு தெரிவித்து முதல்வா் அரவிந்த் கேஜரிவால் ஞாயிற்றுக்கிழமை வெளியிட்ட ட்விட்டா் பதிவில் ‘இது கபில் சிபல் சாஹிப்பின் மிக முக்கிய முன்முயற்சியாகும். இதில் இணையுமாறு அனைவரையும் கேட்டுக் கொள்கிறேன். நாம் அநீதிக்கு எதிராக ஒன்றிணைந்து போராடுவோம்’ என்று தெரிவித்துள்ளாா்.
இது குறித்து பின்னா் அவா் செய்தியாளா்களிடம் கூறியதாவது: சிபல் ஒரு பிரபலமான வழக்குரைஞா். சமூக மற்றும் அரசியல் பிரச்னைகள் என்று வரும் போது மிகவும் சுறுசுறுப்பாக இயங்கி வருபவா். சிபல் தனது முன்முயற்சியுடன், சமூகத்தின் பல்வேறு பிரிவுகளைச் சோ்ந்த மக்களையும் குறிப்பாக நாடு முழுவதும் உள்ள வழக்குரைஞா்களையும் இணைக்க விரும்புகிறாா்.
கபில் சிபலின் நல்ல முன்முயற்சியாகும் இது. இந்த முன்முயற்சியில் நாட்டின் வழக்குரைஞா்கள், பொதுமக்களை சேருமாறு கேட்டுக் கொள்கிறேன். மேலும், எங்கு அநீதி இழைக்கப்பட்டாலும் அங்கு பாதிக்கப்பட்டவா்களுக்கு நீதி கிடைக்க அனைத்து முயற்சிகளையும் செய்ய வேண்டும் எனக் கேட்டுக் கொள்கிறேன் என்று கேஜரிவால் கூறினாா்.
இந்த புதிய தளத்தை சனிக்கிழமை அறிவித்து கபில் சிபல் கூறுகையில், ‘குடிமக்களுக்கு எதிராக பொறுப்புக்குரிய அரசு செயல்பட்டு வருகிறது. புதிய தளத்தின் பொதுக் கூட்டம் மாா்ச் 11-ஆம் தேதி ஜந்தா் மந்தரில் நடத்தப்பட உள்ளது. அங்கு இந்தியாவி ன் புதிய பாா்வையை முன்வைக்க உள்ளோம். இந்நிகழ்ச்சியில் என்னுடன் பங்கேற்க எதிா்க்கட்சித் தலைவா்கள் மற்றும் பொதுமக்கள் உள்பட அனைவரையும் அழைக்கிறேன்’ என்றாா்.
சிபலின் புதிய தளத்திற்கு சிவ சேனை (யுபிடி) தலைவா் உத்தவ் தாக்கரேவும் தனது ஆதரவைத் தெரிவித்துள்ளாா். அதில், ‘ஜனநாயகம் வாழவும், செழிக்கவும் விரும்பும் அனைவரும் கபில் சிபலின் புதிய முன்முயற்சிக்கு அவருடன் உறுதியுடன் துணைநிற்க வேண்டும்’ என்று தெரிவித்துள்ளாா்.
பிகாா் துணை முதல்வா் தேஜஸ்வி யாதவும் சிபலின் புதிய சிந்தனைக்கு தனது ஆதரவை அளித்துள்ளாா். இது தொடா்பாக அவா் தனது ட்விட்டா் பக்கத்தில், ‘நாங்கள் உங்கள் சிந்தனையுடன் ஒன்றுபட்டு இருக்கிறோம். வழக்குரைஞா்களுக்கு ஒரு முக்கியப் பங்கு இருப்பதை ஒப்புக்கொள்கிறேன். இந்த மாபெரும் தேசத்தின் ஒற்றுமை, ஒருமைப்பாட்டைக் காக்க அவா்கள் இந்திய குடிமக்களுடன் சோ்ந்து ஒன்றிணைக்க வேண்டும்’ என்று தெரிவித்துள்ளாா்.
பாஜக அதிரடி: இதனிடையே, தில்லி பாஜக செய்தித் தொடா்பாளா் கேம்சந்த் சா்மா தனது ட்விட்டா் பதிவில், ‘ஊழலுக்கு எதிரான இந்தியா (ஐஏசி) இயக்கத்தின் ஒரு பகுதியாக கேஜரிவால் இருந்த போது, அதன் உறுப்பினா்கள் கபில் சிபல் இல்லம் முன் போராட்டம் நடத்தி, அவரைத் திருடன் என்று கூறினா். இன்றைக்கு அவா் ‘சாஹிப்’ ஆகிவிட்டாா். தற்போது திருடா்களின் ஒப்பந்ததாரரும் திருடா்களின் சாகிப்பும் ஊழலைக் காப்பாற்ற முடியாது’ என்று தெரிவித்துள்ளாா்.