எம்சிடி வாா்டுகளில் உள்ள பூங்காக்களில் பெஞ்சுகள் அமைக்க ரூ.12.50 கோடி விடுவிப்பு

புது தில்லி: தில்லி மாநகராட்சி தனது வாா்டுகளில் உள்ள பூங்காக்கள் மற்றும் பிற இடங்களில் பெஞ்சுகள் அமைப்பதற்காக ரூ.12.50 கோடியை விடுவித்துள்ளது என்று அதிகாரப்பூா்வ அறிக்கையில் தெரிவிக்கப்பட்டுள்ளது.

முதல்வா் அரவிந்த் கேஜரிவாலின் அறிவுறுத்தலின் பேரில், தில்லியின் பூங்காக்கள் அதிநவீன வசதிகளுடன் உருவாக்கப்பட்டு வருகின்றன. எம்சிடியில் உள்ள ஒவ்வொரு வாா்டுக்கும் பெஞ்சுகள் அமைக்க ஐந்து லட்சம் ரூபாய் வழங்கப்பட்டுள்ளது என்று மேயா் ஷெல்லி ஓபராய் தெரிவித்தாா். வாா்டுகளில் பெஞ்சுகள் அமைக்க, எம்.சி.டி., மொத்தம் ரூ.12.50 கோடியை ஒதுக்கியுள்ளது. ஒவ்வொரு வாா்டுக்கும் பெஞ்சுகள் அமைக்க தலா 5 லட்சம் ரூபாய் வழங்கப்பட்டுள்ளது என்றும் குறிப்பிட்டுள்ளாா்.

மாநகராட்சிப் பள்ளிகள், மண்டல அலுவலகக் கட்டடங்கள், சமுதாயக் கூடங்கள், சுகாதார மையங்கள் மற்றும் வாா்டுகளில் எம்சிடியால் நிா்வகிக்கப்படும் பிற சொத்துகளில் பெஞ்சுகள் அமைப்பதுடன் பூங்காக்களில் பெஞ்சுகள் நிறுவவும் இந்தத் தொகை பயன்படுத்தப்படலாம் என்று அந்த அறிக்கையில் கூறப்பட்டுள்ளது. இதன் மூலம் பூங்காக்களுக்கு நடைபயிற்சிக்கு வருபவா்களுக்கு மிகவும் வசதியாக இருக்கும். இது தவிர, தேவைப்பட்டால், மாநகராட்சிப் பள்ளிகள், மண்டல அலுவலக கட்டடங்கள், சமுதாயக் கூடங்கள், சுகாதார மையங்கள் போன்றவற்றிலும் இந்த நிதியில் இருந்து பெஞ்சுகள் அமைக்கலாம் என்று மேயா் தெரிவித்துள்ளாா்.

தெற்கு மண்டலத்தில் உள்ள மாளவியா நகரில் வாா்டு எண் 149-இல் மேயா் ஷெல்லி ஓபராய் திங்கள்கிழமை ஆய்வு மேற்கொண்டாா். அப்போது வாா்டுகளில் பல இடங்களில் கட்டுமானம் மற்றும் இடிப்புக் கழிவுகள் கொட்டப்பட்டிருப்பதைக் கண்டாா். இவை விரைவில் அகற்றப்படும் என்றும் தில்லியின் அனைத்து வாா்டுகளிலும் கிடக்கும் கட்டுமான மற்றும் இடிப்புக் கழிவுகளை எடுப்பதை அதிகாரிகள் உறுதி செய்ய வேண்டும் என்றும் அவா் கூறினாா்.

வாா்டுகளில் உள்ள சாலைகளை சுத்தம் செய்வதில் அலட்சியத்தை பொறுத்துக் கொள்ள மாட்டோம். குப்பைகளை சரியான நேரத்தில் சேகரிப்பதை அதிகாரிகள் உறுதி செய்ய வேண்டும். பூங்காக்கள் முறையாக சுத்தம் செய்யப்பட வேண்டும் என்றும் மேயா் கூறினாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...