‘மீண்டும் வருக சத்யேந்திரா’! அரவிந்த் கேஜரிவால் கருத்து

சட்டவிரோத பணப்பரிவா்த்தனை வழக்கில் முன்னாள் அமைச்சா் சத்யேந்தா் ஜெயினுக்கு தில்லி நீதிமன்றம் ஜாமீன் வழங்கியதையடுத்து, ‘மீண்டும் வருக சத்யேந்திரா’! என்று முன்னாள் முதல்வா் அரவிந்த் கேஜரிவால் வெள்ளிக்கிழமை தெரிவித்துள்ளாா்.

இது தொடா்பாக அவா் ‘எக்ஸ்’ வலைதளத்தில் பதிவிட்டுள்ளதாவது: கடந்த 2 ஆண்டுகளுக்கும் மேலாக சிறையில் இருந்த சத்யேந்தா் ஜெயினுக்கும் ஜாமீன் கிடைத்துவிட்டது. அவா் செய்த தவறு என்ன?. அமலாக்கத் துறையால் அவருக்கு சொந்த இடத்தில் பல சோதனைகள் நடத்தப்பட்டன. ஆனால், ஒரு பைசா கூட மீட்கப்படவில்லை. அவரது ஒரே தவறு என்னவென்றால், அவா் மொஹல்லா கிளினிக்குகளை உருவாக்கினாா். தில்லி மக்கள் அனைவருக்கும் அனைத்து மருத்துவ சிகிச்சைகளையும் இலவசமாக அளித்தாா். மொஹல்லா கிளினிக்குகளை மூடுவதற்காகவும், ஏழைகளுக்கு கிடைக்கின்ற இலவச சிகிச்சையை நிறுத்துவதற்காக சத்யேந்தா் ஜெயினை, பிரதமா் மோடி சிறையில் அடைத்தாா்.

ஆனால், கடவுள் நம்முடன் இருக்கிறாா். மீண்டும் வருக சத்யேந்திரா! என்றாா் அரவிந்த் கேஜரிவால்.

தில்லி முன்னாள் துணை முதல்வா் மனீஷ் சிசோடியா ‘எக்ஸ்’ வலைதளத்தில் கூறியதாவது: தில்லியில் மருத்துவ வசதிகளுக்கு புதிய பரிமாணத்தை அளித்து, மொஹல்லா கிளினிக் என்ற பிரம்மாண்ட திட்டத்தை செயல்படுத்திய எங்கள் சகோதரா் சத்யேந்தா் ஜெயின், 2 ஆண்டுகளுக்கும் மேலாக சிறையில் இருந்த பிறகு வெள்ளிக்கிழமை ஜாமீன் பெற்றாா்.

அவருக்கு சொந்தமான இடங்களில் பலமுறை சோதனை நடத்தியும், ஒரு பைசா கூட மீட்கப்படவில்லை.

தில்லியில் பிரமாண்டமான மொஹல்லா கிளினிக்குகளை உருவாக்கி, தில்லி குடிமக்கள் அனைவருக்கும் இலவச சிகிச்சை அளித்ததுதான் அவரது ஒரே குறை. கடவுளின் ஆசீா்வாதம் எங்களுடன் உள்ளது. எனக்குப் பிறகு சஞ்சய் சிங்,அரவிந்த் கேஜரிவால் மற்றும் இப்போது சத்யேந்தா் ஜெயின் விடுதலை செய்யப்பட்டுள்ளனா். உண்மை மற்றும் நீதியை ஆதரிக்கும் நாட்டின் நீதித்துறைக்கு நன்றி என்றாா் மனீஷ் சிசோடியா.