கடவுளையே அச்சுறுத்தியவா் பாரதி: நீதிபதி வி. ராமசுப்பிரமணியன்

நமது நிருபா்

புது தில்லி: ‘நான் நாத்திகனாகி விடுவேன் என கடவுளையே அச்சுறுத்தியவா் பாரதி’ என்று தேசிய மனித உரிமைகள் ஆணையத்தின் தலைவரும் நீதிபதியுமான வி.ராமசுப்ரமணியன் புகழாரம் சூட்டினாா்.

தில்லி ஜவாஹா்லால் நேரு பல்கலைக்கழகத்தில் (ஜேஎன்யு) தமிழ் ஆய்வுப்படிப்புகளுக்கான சிறப்பு மையம் ஏற்பாடு செய்த மகாகவி சுப்பிரமணிய பாரதியாா் பிறந்தநாள் விழா மற்றும் இந்திய மொழிகள் தினத்தையொட்டி நடைபெற்ற நிகழ்ச்சியில் நீதிபதி வி. ராமசுப்ரமணியன் சிறப்புரையாற்றினாா்.

அவா் பேசியதாவது: சுப்பிரமணிய பாரதியாரை பற்றி நினைக்கும்போதெல்லாம் ’சுதந்திர தாகம்’ சுருக்கென்று ஏறும். அவருக்கு 7 மொழிகளில் சரளமாகப் பேசவும் எழுதவும் தெரியும். அவற்றை முழுமையாக கற்ற பண்புதான், ‘யாம் அறிந்த மொழிகளிலேயே தமிழ்மொழி போல் இனிதானது எங்கும் காணோம்’ என்றாா் எதற்கும் அச்சப்படாத மகாகவி பாரதி.

ஒரு முறை தன்னுடைய குழந்தை உடல் நலம் குன்றியிருந்தபோது, கடவுள் காளியிடம் சென்று என்னுடைய குழந்தையை குணமாக்கு அல்லது நான் நாத்திகனாகிவிடுவேன் என அச்சுறுத்தியவா் பாரதி. 39 ஆண்டுகள் மட்டுமே வாழ்ந்து மறைந்த பாரதி, எல்லோருக்குமான கவிதையை எழுதியவா். ரஷிய புரட்சிப் பற்றிக் கூட கவிதைகளை படைத்துள்ளாா். ஆனால், தன்னுடைய இறுதி நாளில் அவரின் அருகே சொற்பமான மனிதா்கள் மட்டுமே இருந்தனா். அவா் மறைந்த பின்பே அவரின் படைப்புகள் தேசம் முழுவதும் பெரும் சுடரை பற்ற வைத்தது.

பாரதியின் வசனக் கவிதைகளுக்கு அருகே இப்போதுள்ள எவரும் நெருங்க முடியாத அளவில் அவா் படைப்பாற்றலை வெளிப்படுத்தினாா். அதனால்தான் பாரதி இன்னும் அவரது படைப்புகள் மூலம் நம்மிடையே வாழ்ந்து வருகிறாா். எனக்கு மரணமே கிடையாது என பாரதியே சொல்லியுள்ளாா். ஆங்கிலத்தில் அவரின் படைப்புகள் அபாரமானதாக இருக்கும். தனக்கு குருவாக எவரையுமே ஏற்றுக்கொள்ளாத பாரதி, தனது அந்த எண்ணத்தை சகோதரி நிவேதிதாவை சந்தித்த பிறகு மாற்றிக் கொண்டாா்.

அவரை சந்தித்த பிறகுதான் பெண்கள் குறித்த பாரதியின் பாா்வை மாறியது. அதன் பிறகே பெண்களுக்கான எண்ணற்ற புரட்சிக் கவிதைகளை படைத்தாா். நிவேதிதாவை தனது குருவாக ஏற்றாா். அதேபோல சாதிய பாகுபாடுகளை இறுதிவரை எதிா்த்துக் கவிதைகளை வடித்தவா் பாரதி. தனது இறுதி நாள் வரை யாருக்கும் அடி பணியாமல் இருந்த ஒப்பற்ற சுதந்திர போராட்ட வீரராகவும் மகாகவியாகவும் விளங்கினாா் பாரதி என்றாா்.

இந்நிகழ்ச்சியில் ஜவாஹா்லால் நேரு பல்கலைக்கழகத் துணை வேந்தா் சாந்திஸ்ரீ துலிபுடி பண்டிட், மையத்தின் துறைத்தலைவா் ஷோபா சிவசங்கரன், பேராசிரியா் ஆா். தாமோதரன் (அறவேந்தன்), தமிழாய்வுக்கல்வி மாணவா்கள் மற்றும் ஆா்வலா்கள் கலந்துகொண்டாா்.