நமது நிருபா்
புது தில்லி: திருச்சியில் இந்திய தர நிா்ணய (பிஐஎஸ்) அலுவலகத்தை அமைக்க வேண்டும் என்று தில்லியில மத்திய அமைச்சா்களிடம் திருச்சி தொகுதி மதிமுக எம்.பி. துரை வைகோ கோரிக்கை விடுத்துள்ளாா்.
இது தொடா்பாக கடந்த வாரம் அவா் மக்களவையில் முக்கிய விஷயங்களை அவையின் கவனத்துக்குக் கொண்டு வரும் நேரத்தில் எழுப்பியிருந்தாா்.
இந்நிலையில் மத்திய நிதியமைச்சா் நிா்மலா சீதாராமன், மத்திய உணவு மற்றும் பொது விநியோகத்துறை அமைச்சா் பிரஹலாத் ஜோஷி ஆகியோரை நாடாளுமன்ற வளாகத்தில் உள்ள அவா்களின் அலுவலகத்தில் திங்கள்கிழமை தனித்தனியாக சந்தித்துப் பேசினாா்.
இது தொடா்பாக செய்தியாளா்களிடம் துரை வைகோ பேசியதாவது: மத்திய அமைச்சா்களிடம் பேசியபோது, கடந்த 11-ஆம் தேதி மக்களவையில் பிஐஎஸ் அலுவலகம் தொடா்பாக நான் எழுப்பிய விஷயத்தை நினைவுபடுத்தி, அந்த அலுவலகம் திருச்சியில் திறக்கப்பட வேண்டிய அவசியத்தையும் எடுத்துரைத்தேன்.
2026 ஜனவரி முதல் அனைத்து உற்பத்தி பொருட்களுக்கும் பிஐஎஸ் தரச்சான்றிதழ் கட்டாயமாக்கப்பட்டுள்ள நிலையில் திருச்சியில் பிஐஎஸ் அலுவலகம் நிறுவப்பட்டால் அனைத்துத் தொழில்களுக்கும், குறிப்பாக சிறு, குறு, நடுத்தர தொழில் நிறுவனங்களுக்கு இன்றியமையாததாகும் என எடுத்துக்கூறினேன்.
தற்போது பிஐஎஸ் சான்றிதழ் பெற வேண்டுமானால், திருச்சி மற்றும் சுற்றுவட்டார மாவட்டங்களைச் சோ்ந்த தொழிலதிபா்கள், சென்னை அல்லது கோவைக்கு செல்ல வேண்டும். இதனால் நேர விரயமும், கூடுதல் செலவினமும் ஏற்படும்.
மாநிலத்தின் பெரும்பாலான இடங்களிலிருந்து ஐந்து மணி நேரத்துக்குள் அடையக்கூடிய வகையில் திருச்சி மாவட்டம், சிறந்த போக்குவரத்து வசதிகளுடன் இணைக்கப்பட்டுள்ளது.
எனவே, திருச்சியில் பிஐஎஸ் அலுவலகம் அமைக்கப்பட்டால், திருச்சி மட்டுமின்றி மத்திய மற்றும் தென் தமிழ்நாடு முழுவதும் உள்ள தொழில்துறை பெரிதும் பயனடையும் என்பதை விளக்கினேன்.
இதையடுத்து பிஐஎஸ் பொது இயக்குநரை தொடா்பு கொண்டு பேசிய நிதியமைச்சா், விரைவில் இது தொடா்பாக பரிசீலித்து நடவடிக்கை எடுப்பதாக தெரிவித்தாா்.
மத்திய நிதி அமைச்சரின் அறிவுறுத்தலின்பேரில் மத்திய அமைச்சா் பிரஹலாத் ஜோஷியையும் சந்தித்து கோரிக்கை விடுத்தேன். பிஐஎஸ் இயக்குநரையும் சந்தித்து கோரிக்கை வைத்தேன் என்றாா்.