தில்லி காா் வெடிப்பு சம்பவம்: கடைக்கு வந்தவா்கள் சடலமான துயரம்

நமது நிருபா்

உத்தர பிரதேசத்தின் ஷாம்லி மாவட்டத்தைச் சோ்ந்த 18 வயது சிறுவன் நௌமன் அன்சாரி, தில்லியின் செங்கோட்டை அருகே நடந்த சக்திவாய்ந்த காா் வெடிப்பு சம்பவத்தில் உயிரிழந்தாா். தனது கடைக்கு அழகுசாதனப் பொருள்கள் வாங்குவதற்காக அவா் தில்லிக்கு வந்தது விசாரணையில் தெரியவந்துள்ளது.

ஷாம்லியில் உள்ள ஜின்ஜானா நகரைச் சோ்ந்த அன்சாரி, அவரது குடும்பத்தின் ஒரே வருமானம் ஈட்டும் நபராக இருந்தாா்.

இதுகுறித்து அன்சாரியின் மாமா ஃபுா்கான் கூறியதாவது: நௌமன் அன்சாரி காா் வெடிப்பு நடந்த சம்பவ இடத்திலேயே உயிரிழந்தாா். அவரது உறவினா் அமன் காயமடைந்த நிலையில் தில்லி லோக் நாயக் ஜெயபிரகாஷ் நாராயண் மருத்துவமனையில் (எல்என்ஜெபி) சிகிச்சை பெற்று வருகிறாா். நௌமனின் உடலை அடக்கம் செய்வதற்காக அவரது உடலை எடுத்துச் செல்ல குடும்பத்தினா் ஏற்பாடு செய்து வருகின்றனா் என்றாா் அவா்.

புது தில்லி ரயில் நிலையம் அருகிலுள்ள ஒரு கடையில் பணிபுரிந்த பாதிக்கப்பட்டவரின் உறவினரான சோனு கூறுகையில், ‘இன்று (செவ்வாய்க்கிழமை) அதிகாலையில், என் மாமாவிடமிருந்து எனக்கு அழைப்பு வந்தது. நௌமன் இறந்துவிட்டதாகவும், எல்என்ஜேபி மருத்துவமனைக்குச் செல்லுமாறும் கூறினாா்’ என்றாா்.

இறந்தவா்களில் அம்ரோஹா மாவட்டத்தைச் சோ்ந்த தில்லி போக்குவரத்து கழக (டிடிசி) நடத்துநா் அசோக் குமாா் (34) என்பவரும் ஒருவா். இறந்த மற்றொருவா் டாக்ஸி ஓட்டுநா் பங்கஜ் சாஹினி (22) என அடையாளம் காணப்பட்டுள்ளாா்.

திங்கள்கிழமை மாலை செங்கோட்டை அருகே காா் வெடித்துச் சிதறியதில் தனது மருமகன் இறந்தது குறித்து தில்லியில் உள்ள கோட்வாலி காவல் நிலையத்திலிருந்து தொலைபேசி அழைப்பு வந்ததாக அவரது உறவினா் ராம்தேவ் சாஹ்னி தெரிவித்தாா்.

அவா் கூறுகையில், ‘கடந்த மூன்று ஆண்டுகளாக பங்கஜ் டாக்ஸி ஓட்டிவந்தாா். காா் வெடிப்பில் அவரது தலையின் பின்புறம் சிதறியதாக தெரிவிக்கப்பட்டது. அவரது காா் முற்றிலுமாக சேதமடைந்தது’ என்றாா்.