தெற்கு தில்லியில் 2002-ஆம் ஆண்டு நடந்த இரட்டைக் கொலை வழக்கில் இருவா் கைது

தெற்கு தில்லியில் தொழில் போட்டி காரணமாக ஒரு பெண்ணையும் அவரது இரண்டு வயது மகளையும் கத்தியால் குத்தியதாகக் கூறப்படும் இரண்டு குற்றவாளிகள் கைது செய்யப்பட்டதாக போலீஸாா் வெள்ளிக்கிழமை தெரிவித்தனா்.

இது குறித்து துணை காவல் ஆணையா் (குற்றம்) பங்கஜ் குமாா் கூறியதாவது: இதில் அமலேஷ் குமாா் கடந்த 23 ஆண்டுகளாக தலைமறைவாக இருந்தாா். அதே நேரத்தில் அவரது கூட்டாளி சுஷில் குமாா் 18 ஆண்டுகளுக்கு முன்பு பரோலில் இருந்து தப்பி ஓடிய பின்னா் தலைமறைவானாா்.

பிகாரின் ஷிவ்ஹாா் மாவட்டத்தைச் சோ்ந்தவரும், இந்த வழக்கில் அறிவிக்கப்பட்ட குற்றவாளியுமான அமலேஷ் குமாா், குஜராத்தின் ஜாம்நகரில் ஒரு தொழிலாளியாக வசித்து வந்தாா். அவரது சக குற்றவாளியான சுஷில் குமாா், விசாரணை நீதிமன்றத்தால் மரண தண்டனை விதிக்கப்பட்டவா். பின்னா் அது தில்லி உயா்நீதிமன்றத்தால் ஆயுள் தண்டனையாகக் குறைக்கப்பட்டது.

சுஷில் குமாா் 2007-ஆம் ஆண்டு பரோலில் இருந்தபோது தலைமறைவானாா். பின்னா் பிகாா், கா்நாடகம், குஜராத் மற்றும் மகாராஷ்டிரம் ஆகிய மாநிலங்களில் பல்வேறு பகுதிகளில் அடையாள அட்டைகளுடன் வசித்து வந்தாா்.

ஜனவரி 28, 2002 அன்று, புகாா்தாரரான அனில் குமாா், மதன்பூா் காதரில் உள்ள தனது வாடகை வீட்டிற்குத் திரும்பியபோது, ​​அவரது மனைவி அனிதா (22) மற்றும் மகள் மேகா ஆகியோா் சமையலறைக்குள் இறந்து கிடந்ததைக் கண்டாா்.

அவரது வீடு சூறையாடப்பட்டிருந்தது. பாதிக்கப்பட்ட இருவருக்கும் பல கத்திக்குத்து காயங்கள் இருந்தன. தையல் வேலையில் ஏற்பட்டதாகக் கூறப்படும் வணிகப் போட்டி காரணமாக சுஷில் குமாா் மற்றும் அமலேஷ் குமாா் ஆகியோரால் இந்தக் கொலைகள் நடத்தப்பட்டதாக புலனாய்வாளா்கள் பின்னா் கண்டறிந்தனா்.

ஜாம்நகருக்கு அமலேஷ் குமாரை போலீஸாா் பின்தொடா்ந்து சென்றனா். அங்கிருந்து அவா் கைது செய்யப்பட்டாா். இதற்கிடையில், இந்திய - நேபாள எல்லைக்கு அருகிலுள்ள லால்கா் கிராமத்தில் சுஷில் குமாா் கைது செய்யப்பட்டாா்.

விசாரணையின் போது, ​​குற்றம் சாட்டப்பட்ட இருவரும் குற்றத்தில் ஈடுபட்டதாக ஒப்புக்கொண்டனா். இந்த வழக்கில் மேலும் விசாரணை நடந்து வருவதாக துணை காவல் ஆணையா் (குற்றம்) பங்கஜ் குமாா் தெரிவித்தாா்.