திருநெல்வேலி மாவட்டத்தில் நடைபெற்ற தனியாா் துறை வேலைவாய்ப்பு முகாமில் 635 பேருக்கு பணிநியமன ஆணைகள் சனிக்கிழமை வழங்கப்பட்டன.
திருநெல்வேலி மாவட்ட நிா்வாகம், மாவட்ட வேலைவாய்ப்பு-தொழில்நெறி வழிகாட்டும் மையம், தமிழ்நாடு மாநில ஊரக - நகா்ப்புற வாழ்வாதார இயக்கம், தூய யோவான் கல்லூரி ஆகியவற்றின் சாா்பில் மாபெரும் தனியாா் வேலைவாய்ப்பு முகாம் சனிக்கிழமை நடைபெற்றது.
இதில், பல்வேறு நிறுவனங்களுக்கு தோ்வு செய்யப்பட்டோருக்கு பணிநியமன ஆணைகள் வழங்கும் நிகழ்ச்சிக்கு ஆட்சியா் இரா.சுகுமாா் தலைமை வகித்தாா். பாளையங்கோட்டை சட்டப்பேரவை உறுப்பினா் மு.அப்துல் வஹாப், கிறிஸ்தவ தேவாலயங்களில் பணியாற்றும் உபதேசியாா்கள் மற்றும் பணியாளா்கள் நலவாரியத் தலைவா் விஜிலா சத்தியானந்த் ஆகியோா் முன்னிலை வகித்தனா். தமிழக சட்டப்பேரவைத் தலைவா் மு.அப்பாவு கலந்துகொண்டு 635 பேருக்கு பணிநியமன ஆணைகளை வழங்கினாா்.
இதுவரை 9,693 பேருக்கு பணி: திருநெல்வேலி மாவட்டத்தில் கடந்த 2021 மே முதல் இதுவரையில் 3 கலைஞா் நூற்றாண்டு விழா சிறப்பு வேலைவாய்ப்பு முகாம்கள் உள்பட 12 மாபெரும் தனியாா்துறை வேலைவாய்ப்பு முகாம்கள் நடத்தப்பட்டுள்ளன. இதன்மூலம் 1,286 வேலையளிக்கும் நிறுவனங்கள் கலந்து கொண்டு 8,230 பேரை பல்வேறு பணிகளுக்கு தோ்வு செய்துள்ளன. 58 சிறிய அளவிலான வேலைவாய்ப்பு முகாம்கள் மூலம் 1463 பேருக்கு பணிநியமனங்கள் வழங்கப்பட்டுள்ளன என முகாமில் தெரிவிக்கப்பட்டது.
இந்நிகழ்ச்சியில் ஊரக வளா்ச்சி முகமை திட்ட இயக்குநா் சரவணன், மாவட்ட வேலைவாய்ப்பு அலுவலா் அந்தோனி உள்ளிட்ட பலா் கலந்துகொண்டனா்.
டிரெண்டிங்
வீடியோக்கள்
தினமணி வீடியோ செய்தி...
தினமணி வீடியோ செய்தி...
தினமணி வீடியோ செய்தி...
தினமணி வீடியோ செய்தி...
செய்தி மடல்
இ-பேப்பர்