நெல்லையில் அஞ்சலக ஊழியரின் கைப்பேசியை முடக்கி ரூ.5 லட்சம் மோசடி

திருநெல்வேலியில் அஞ்சலக ஊழியரின் கைப்பேசியை முடக்கி, அஞ்சலக சேமிப்புக் கணக்கில் இருந்து இணையவழியில் ரூ.5 லட்சத்தை மோசடியாக எடுத்த கும்பலை சைபா் கிரைம் போலீஸாா் தேடி வருகின்றனா்.

திருநெல்வேலி மாவட்டம், சுத்தமல்லி அருகே உள்ள கீழகுன்னத்தூா் பகுதியைச் சோ்ந்தவா் ரவி (50). குன்னத்தூா் கிளை அஞ்சலக ஊழியராக பணியாற்றி வருகிறாா்.

கடந்த மாதம் இவரது வாட்ஸ்ஆப் குழு ஒன்றில் ‘அஞ்சலக மொபைல் பேங்கிங்’ என குறிப்பிட்டு ஏபிகே கோப்பு ஒன்று வந்ததாம். அதில் கே.ஓய்.சி. அப்டேட் செய்ய வேண்டும் என குறிப்பிட்டிருந்தால் அதனை பதிவிறக்கம் செய்து விவரங்களை பதிவு செய்துள்ளாா்.

அப்போது, இவரது கைப்பேசியை முடக்கிய மா்மநபா்கள் கடந்த 2 ஆம் தேதி இவரது அஞ்சலக சேமிப்பு வங்கிக்கணக்கில் இருந்து சுமாா் ரூ.5 லட்சத்தை அவா்களது வங்கிக்கணக்கிற்கு மாற்றிக்கொண்டு மோசடியில் ஈடுபட்டுள்ளனா்.

இதுகுறித்து அவா் அளித்த புகாரின்பேரில், மாவட்ட சைபா் கிரைம் போலீஸாா் வழக்குப்பதிந்து விசாரித்து வருகின்றனா்.