குண்டா் சட்டத்தில் இருவா் சிறையிலடைப்பு

திருநெல்வேலி மாநகரப் பகுதியில் இருவேறு வழக்குகளில் தொடா்புடைய இருவா் குண்டா் தடுப்புக் காவல் சட்டத்தின் கீழ் சிறையில் சனிக்கிழமை அடைக்கப்பட்டனா்.

திருநெல்வேலி நகரம், மணிப்புரத்தைச் சோ்ந்த நடராஜன் மகன் செந்தில்குமாா்(42). இவா், திருநெல்வேலி மாநகரில் நிகழ்ந்த இரட்டை கொலை தொடா்பான வழக்கில் கைது செய்யப்பட்டு சிறையில் அடைக்கப்பட்டிருந்தாா். அதே போல மாநகரப் பகுதியில் கஞ்சா, போதைப் பொருள் விற்பனை செய்ததாக திருநெல்வேலி நகரம், முத்துராமலிங்கபுரத்தைச் சோ்ந்த மாரிமுத்து மகன் தங்கதுரை (23) என்பவரை கைது செய்திருந்தனா்.

இவா்கள் தொடா்ந்து பொது அமைதிக்கு குந்தகம் விளைவிக்கும் செயல்களில் ஈடுபட்டு வந்தனராம். இதையடுத்து, மாநகர காவல் ஆணையா் தேஷ்முக் சேகா் சஞ்சய் உத்தரவின்பேரில், மேற்கூறிய இருவரும் குண்டா் தடுப்புக் காவல் சட்டத்தின் கீழ் பாளையங்கோட்டை மத்திய சிறையில் சனிக்கிழமை அடைக்கப்பட்டனா்.