குமரியில் இருந்து சென்னைக்கு மாற்றுத் திறனாளி இளைஞர் கார் பயணம்

கன்னியாகுமரியில் இருந்து சென்னைக்கு மாற்றுத் திறனாளி இளைஞர் ஞாயிற்றுக்கிழமை காரில் பயணம் மேற்கொண்டார்.

சென்னை பகுதியைச் சேர்ந்தவர் ரவிதேசிகன் (44). இளம் வயதில் போலியோ நோயால் இரு கால்களும் பாதிக்கப்பட்டவர்.

மாற்றுத் திறனாளிகளுக்கு விழிப்புணர்வை ஏற்படுத்த வேண்டும்; மாற்றுத் திறனாளிகளுக்கு கார் ஓட்டுவதில் உள்ள விதிமுறைகளை தளர்த்த வேண்டும் என்பதை வலியுறுத்தி இந்தப் பயணத்தை மேற்கொள்வதாக இவர் தெரிவித்தார்.

கடந்த 3 ஆண்டுகளில் ஒன்றரை லட்சம் கி.மீ. தொலைவுக்கு கார் ஓட்டியுள்ளதாகக் கூறும் இவர், நிகழாண்டு இறுதிக்குள் சென்னையில் இருந்து தில்லிக்கு இடைநில்லாத சாதனை கார் பயணம் மேற்கொள்ளவிருப்பதாகத் தெரிவித்தார். இந்த சாதனைப் பயணத்தை தொடங்கி வைக்க தமிழக முதல்வரின் அனுமதிக்காக காத்திருப்பதாகவும் தெரிவித்தார்.