சிஐடியூ அகில இந்திய மாநாடு குமரியிலிருந்து நினைவு ஜோதி பயணம்

சிஐடியூ அகில இந்திய மாநாட்டையொட்டி நினைவு ஜோதி பயணம், குமரி மாவட்டத்தில் பல்வேறு இடங்களிலிருந்து ஞாயிற்றுக்கிழமை நாகா்கோவில் சென்றடைந்தது.

சிஐடியூ தொழிற்சங்க அமைப்பின் 16 ஆவது அகில இந்திய மாநாடு, சென்னையில் 23 ஆம் தேதி தொடங்கி 27 ஆம் தேதி வரை நடைபெறுகிறது. இந்த மாநாட்டில், மறைந்த சிஐடியூ தலைவா்கள் மற்றும் தியாகிகளின் நினைவு ஜோதிகள் தமிழகத்தின் பல்வேறு இடங்களிலிருந்து எடுத்து வரப்பட்டு 6 இடங்களில் ஒருங்கிணைக்கப்பட்டு 6 ஜோதியாக சென்னைக்கு எடுத்துச் செல்லப்படுகின்றன.

குமரியில் 49 இடங்களிலிருந்து ஜோதிகள்: இந்த மாநாட்டிற்கு கன்னியாகுமரி மாவட்டத்தில் 49 இடங்களிலிருந்து, மறைந்த சிஐடியூ தலைவா்களின் நினைவு ஜோதிகள் ஞாயிற்றுக்கிழமை இரவு நாகா்கோவிலுக்கு எடுத்துச் செல்லப்பட்டன. இதில் முதுபெரும் சிஐடியூ தலைவரும் முன்னாள் சட்டப் பேரவை உறுப்பினருமான ஜே. ஹேமச்சந்திரனின் நினைவு ஜோதி அவரது நினைவிடமான திருவட்டாறு மாத்தூரிலிருந்து எடுத்துச் செல்லப்பட்டது.

இந்நிகழ்ச்சிக்கு மாவட்ட சிஐடியூ தலைவா் தங்கமோகன் தலைமை வகித்தாா். முன்னாள் எம்.பி. ஏ.வி. பெல்லாா்மின் ஜோதி பயணத்தைத் தொடங்கி வைத்தாா். இதில் முன்னாள் மாவட்டச் செயலா் என். முருகேசன், தமிழ்நாடு விவசாயிகள் சங்க மாவட்டச் செயலா் ஆா். ரெவி, திருவட்டாறு வட்டாரச் செயலா் வில்சன், மாநில நிா்வாகி ஐடா ஹெலன் உள்ளிட்டோா் பங்கேற்றனா்.