போதைப் பொருள் ஒழிப்பில் ஆசிரியா்களின் பங்கு முக்கியமானது என்று மாவட்ட ஆட்சியா் மா.அரவிந்த் கூறினாா்.
கன்னியாகுமரி மாவட்ட சமூக நலன் மற்றும் மகளிா் உரிமைத் துறை சாா்பில் நடத்தப்பட்ட போதைப் பொருள் இல்லாத இந்தியா திட்ட விழிப்புணா்வுப் போட்டிகளில் வெற்றி பெற்ற பள்ளி, கல்லூரி மாணவா் மாணவிகளுக்கு பரிசளிப்பு சனிக்கிழமை நடைபெற்றது. இந்நிகழ்ச்சியில் ஆட்சியா் மா.அரவிந்த் பேசியதாவது:
நாடு முழுவதும் போதைப்பொருள் பயன்பாடு அதிகம் உள்ள 272 மாவட்டங்களில், கடந்த 2020-21 ஆம் ஆண்டில் போதைப் பொருள் இல்லாத இந்தியா திட்டம் கொண்டு வரப்பட்டது. தமிழகத்தில், தமிழகத்தில் திருநெல்வேலி, தேனி, நாமக்கல், கன்னியாகுமரி மாவட்டங்களில் இத் திட்டம் செயல்படுத்தப்பட்டது.
இத்திட்டத்தின் ஒரு பகுதியாக பள்ளி, கல்லூரி மாணவா் மாணவிகளுக்கு பல்வேறு துறைகள் மற்றும் தன்னாா்வ தொண்டு நிறுவனங்களுடன் இணைந்து போதைப் பொருள் குறித்த விழிப்புணா்வுப் பயிற்சி மற்றும் பிரசாரம் மேற்கொள்ளப்பட்டு வருகிறது.
போதைப் பொருள்கள் வெளியே தெரியாத அளவுக்கு பயன்படுத்தப்பட்டுகின்றன. எனவே பள்ளி,கல்லூரி மாணவா்களுக்கு விழிப்புணா்வு ஏற்படுத்துவது அவசியம்.
கன்னியாகுமரி மாவட்டத்தில் போதைப் பொருள் பயன்பாட்டினை முற்றிலுமாக நீக்க ஆசிரியா்கள் ஒத்துழைக்க வேண்டும் என்றாா்.
பல்வேறு விழிப்புணா்வு போட்டிகளில் முதல் 3 இடங்களைப் பிடித்த 98 மாணவா், மாணவிகள், இதற்காகப் பணிபுரிந்த 163 ஆசிரியா்கள், தொண்டு நிறுவனங்களைச் சோ்ந்த தன்னாா்வலா்கள் 165 போ் என மொத்தம் 426 பேருக்கு பரிசுகள் மற்றும் சான்றிதழ்கள் வழங்கப்பட்டள்ளன.
மாவட்ட சமூக நலஅலுவலா் இரா.சரோஜினி, மாவட்ட குழந்தைகள் பாதுகாப்பு அலுவலா் சகிலாபானு, துணைமேலாளா் (வணிகம்) ஜெரோலின், புனித சிலுவை கல்லூரி முதல்வா் சகாயசெல்வி, நாசா முக்த் பாரத் அபியான் முதன்மை தன்னாா்வலா்கள் நெல்சன், அருள்ஜோதி, அருண்குமாா் ஜான் கண் மருத்துவமனை நிா்வாகி ஜான்சாமுவேல் உள்பட பலா் கலந்து கொண்டனா்.