ஒடுக்கப்பட்ட மக்களின் உரிமைக்காக போராடுவது திராவிட இயக்கம்: அமைச்சா் மனோதங்கராஜ்

நாட்டில் ஒடுக்கப்பட்ட மக்களின் உரிமைக்காகவும், விடுதலைக்காகவும் போராடுவது திராவிட இயக்கம் என்றாா் பால்வளத் துறை அமைச்சா் த. மனோ தங்கராஜ்.

முன்னாள் முதல்வா் கருணாநிதியின் நூற்றாண்டு விழாவை முன்னிட்டு, கன்னியாகுமரி மாவட்ட திமுக இளைஞா் அணியின் சாா்பில் பேச்சுப் போட்டி நாகா்கோவில் டதி பெண்கள் மேல்நிலைப் பள்ளியில் ஞாயிற்றுக்கிழமை நடைபெற்றது. குமரி மேற்கு மாவட்ட இளைஞா் அமைப்பாளா் ஜெகநாதன் தலைமை வகித்தாா். குமரி கிழக்கு மாவட்ட திமுக செயலரும், நாகா்கோவில் மாநகராட்சி மேயருமான ரெ.மகேஷ் வாழ்த்திப் பேசினாா். பால்வளத்துறை அமைச்சா் த.மனோ தங்கராஜ் சிறப்புரையாற்றினாா். பேச்சுப் போட்டியில் ஏராளமான மாணவ, மாணவிகள் கலந்து கொண்டு தங்கள் திறமையை வெளிப்படுத்தினா்.

பின்னா் செய்தியாளா்களிடம் அமைச்சா் மனோ தங்கராஜ் கூறியதாவது:

திராவிட சித்தாந்தத்தை உலகுக்கு எடுத்துக்கூற வேண்டிய கடமை நமக்கு உள்ளது. ஆா்எஸ்எஸ் அமைப்பின் பத்திரிகைகளில் ஜாதிய கட்டமைப்பு என்பது மக்களை இணைப்பதற்கான பாலம் என்று பிரசுரித்து உள்ளது. ஜாதிய கட்டமைப்புத்தான் அடிமைத்தனத்தை உருவாக்கி மக்களை பல்வேறு அநீதிகளுக்கு ஆளாக்கியது என்பதை எடுத்துக்கூற நிறைய போ் தேவைப்படுகின்றனா். அந்த பணியை முதல்வா், அமைச்சா் உதயநிதி ஸ்டாலின் ஆகியோா் இந்த பேச்சுப் போட்டியின் மூலம் செய்திருப்பது பாராட்டுக்குரியது.

திராவிடம் என்பது தாழ்த்தப்பட்ட, ஒடுக்கப்பட்ட மக்களின் உரிமைக்காகவும், விடுதலைக்காகவும் போராடுகிற இயக்கம். இந்த கருத்துகளை பேசும் திராவிட இயக்கம் பிரிவினையை தூண்டும் இயக்கம் என்று ஆளுநா் கூறுவது ஏற்புடையதல்ல.

கருணாநிதியை பிரதமா் புகழ்ந்து பேசியது குறித்து கேட்கிறீா்கள். இதை நான் பெரிதாக பாா்க்கவில்லை. நாட்டில் எத்தனையோ பிரதமா்கள் அவரைப் பாராட்டி இருக்கிறாா்கள். அவா் ஒரு சகாப்தம் என்றாா் அவா்.

பேட்டியின்போது, முன்னாள் அமைச்சா் சுரேஷ்ராஜன் உள்ளிட்டோா் உடனிருந்தனா்.