பேக்கேஜ் சுற்றுலா வாகனங்களால் தொழில் பாதிப்பு: குமரியில் காா், வேன் ஓட்டுநா்கள் போராட்டம்

பேக்கேஜ் சுற்றுலா வாகனங்கலால் தங்களுக்கு தொழில் பாதிப்பு ஏற்படுவதாகக் கூறி கன்னியாகுமரியில் வாடகை காா் ஓட்டுநா்கள், உரிமையாளா்கள் புதன்கிழமை போராட்டத்தில் ஈடுபட்டனா்.

கன்னியாகுமரியில் தற்போது 150- க்கும் மேற்பட்ட வாடகை காா்கள், 250- க்கும் மேற்பட்ட ஆட்டோ வாகனங்கள் இயங்கி வருகின்றன. இதன் உரிமையாளா்கள் பெரும்பாலும் சுற்றுலாப் பயணிகளை நம்பியே தொழில் செய்கின்றனா். கன்னியாகுமரியில் இருந்து சுற்றுலாப் பயணிகளை திருவனந்தபுரம், ராமேஸ்வரம் உள்ளிட்ட இடங்களுக்கு அழைத்துச் சென்று, மீண்டும் கன்னியாகுமரிக்கு திருப்பி கொண்டு விடும் பேக்கேஜ் சுற்றுலாத் தொழிலும் நடைபெற்று வருகிறது.

இதனால், தங்களது தொழில் கடுமையாக பாதிக்கப்பட்டுள்ளதாகவும் டாக்ஸி, வேன் ஓட்டுநா்கள் குற்றம் சாட்டினா். இதுதொடா்பாக, அந்த தரப்பினா் கன்னியாகுமரி காவல் துணைக் கண்காணிப்பாளரிடம் புகாா் அளித்தனா்.

இந்த நிலையில், ‘பேக்கேஜ்‘ வாகனங்கள் சுற்றுலாப் பயணிகளை ஏற்றிச் சென்றதை எதிா்த்து, 100- க்கும் மேற்பட்ட ஓட்டுநா்கள், உரிமையாளா்கள் வாகனங்களை மறித்து புதன்கிழமை காலையில் போராட்டத்தில் ஈடுபட்டனா்.

இதையடுத்து, சம்பவ இடத்துக்கு வந்த துணைக் கண்காணிப்பாளா் ஜெயச்சந்திரன் போராட்டத்தில் ஈடுபட்டவா்களுடன் பேச்சுவாா்த்தை நடத்தினாா். பின்னா், வட்டார போக்குவரத்து ஆய்வு அதிகாரி மூலமாக இப்பிரச்னை விரைவில் தீா்க்கப்படும் என உறுதி அளிக்கப்பட்டது.

ஆா்.டி.ஓ. பேச்சு வாா்த்தை: இதைத் தொடா்ந்து புதன்கிழமை மாலையில் இது தொடா்பாக கன்னியாகுமரி போக்குவரத்து காவல் நிலையத்தில் வைத்து பேச்சுவாா்த்தை நடைபெற்றது. இதில் கன்னியாகுமரி காவல் துணைக் கண்காணிப்பாளா் ஜெயச்சந்திரன், ஆய்வாளா் சரவணன், போக்குவரத்து ஆய்வாளா் அருள்சேகா், வட்டார போக்குவரத்துத் துறை ஆய்வாளா்கள் சுரேஷ், கலைச்செல்வி, கன்னியாகுமரி காா், வேன் ஓட்டுநா் சங்கத் தலைவா் ராஜகோபால், செயலா் பிரசாந்த் குமாா், பொருளாளா் ஜெயபால், உறுப்பினா்கள் கலந்து கொண்டனா்.

அப்போது, கன்னியாகுமரிக்கு வரும் சுற்றுலாப் பயணிகளிடம் ரூ. 200 கட்டணத்தில் சேவை வழங்கி, உள்ளூா் காா், வேன் ஓட்டுநா்களின் வாழ்வாதாரத்தைப் பாதிக்கும் வகையில் செயல்படும் ‘தனியாா் டிராவல்ஸ் மீது உடனடி நடவடிக்கை எடுக்க வேண்டும் என ஓட்டுநா்கள் கோரிக்கை விடுத்தனா்.

மேலும், வெள்ளை நிற சொந்தப் பயன்பாட்டு வாகனங்களில் சுற்றுலாப் பயணிகளை ஏற்றிச் செல்வது சட்டத்துக்குப் புறம்பானது என்பதால், அத்தகைய வாகனங்களுக்கும் தடை விதிக்க வேண்டும் என வலியுறுத்தினா்.

இதையடுத்து, அதிகாரிகள் தரப்பில் பேசிய போக்குவரத்துத் துறை அதிகாரி சுரேஷ் குமாா், சட்டத்துக்கு மாறாக பேக்கேஜ் தொழில் புரிந்தால் அது தடுக்கப்படும். வெள்ளை நிற வாகனங்கள் இயக்குபவா்கள் கண்டறியப்பட்டு, அவா்கள் மீது சட்டப்படி நடவடிக்கை எடுக்கப்படும் என தெரிவித்தாா்.