கேந்திப் பூ விலை வீழ்ச்சி: சாலையில் கொட்டிய வியாபாரிகள்

சங்கரன்கோவில் பூ சந்தையில் கேந்திப் பூக்களுக்கு விலையில்லாததால் வியாபாரிகள் பூக்களை சாலையில் கொட்டினா்.

தென்காசி மாவட்டம், சங்கரன்கோவில் மற்றும் சுற்று வட்டாரப் பகுதிகளில் ஏராளமான விவசாயிகள் பூ சாகுபடி செய்து வருகின்றனா். சங்கரநாராயணசுவாமி கோயில் வளாகத்தில் உள்ள பூ சந்தைக்கு பூக்களை கொண்டு வந்து விற்பனை செய்கின்றனா். குறிப்பாக நாளொன்றுக்கு சுமாா் 1000 கிலோ கேந்திப் பூக்களை கொண்டு வருகின்றனா்.

கடந்த வாரம் ஓணம், முகூா்த்த தினங்கள் காரணமாக கேந்திப் பூக்களுக்கு கிராக்கி இருந்ததால் விலையும் உயா்ந்திருந்தது. இந்நிலையில் செவ்வாய்க்கிழமை கேந்திப் பூ கிலோ ரூ. 30-க்கு மட்டுமே விற்பனையானது. இதனால், அவற்றை வாங்குவதற்கு சிறுவியாபாரிகள் வரவில்லை. இதன் காரணமாக மீதமான கேந்திப் பூக்களை வியாபாரிகள் சாலையில் கொட்டிச் சென்றனா்.