தூய்மை இந்தியா திட்ட விழிப்புணர்வு: குமரியிலிருந்து தில்லிக்கு சைக்கிள் பயணம்

தூய்மை இந்தியா திட்ட விழிப்புணர்வுக்காக கன்னியாகுமரி முதல் தில்லி வரை சைக்கிள் பயணம் மேற்கொள்ளும் இளைஞருக்கு திருநெல்வேலியில் வெள்ளிக்கிழமை வரவேற்பு அளிக்கப்பட்டது.

உத்தரப்பிரதேச மாநிலம், பத்தேகர் பகுதியைச் சேர்ந்தவர் அபிஷேக்குமார் சர்மா (28).  தூய்மை இந்தியா திட்ட விழிப்புணர்வு ஏற்படுத்தும் வகையில், கன்னியாகுமரி முதல் தில்லி வரை சைக்கிள் பயணம் மேற்கொள்கிறார். திருநெல்வேலிக்கு வெள்ளிக்கிழமை வந்த அவருக்கு ஜூட்டாராம் பட்டேல் தலைமையில் வரவேற்பு அளிக்கப்பட்டது.

இந்த பயணம் குறித்து அபிஷேக்குமார் சர்மா கூறியதாவது: தூய்மை இந்தியா திட்டம்  குறித்து மக்களிடம் விழிப்புணர்வு ஏற்படுத்தும் வகையில் விழிப்புணர்வு சைக்கிள் பயணத்தை கடந்த 2014 ஆம் ஆண்டு நவம்பரில் தொடங்கினேன். முதல்கட்டமாக கான்பூர்-காஷ்மீர் வரையும், 2 ஆம் கட்டமாக காஷ்மீர்-ஆமதாபாத் வரையும், 3 ஆம் கட்டமாக ஆமதாபாத்-கன்னியாகுமரி வரையும் சைக்கிள் பயணம் செய்துள்ளேன்.

நான்காவது கட்டமாக கன்னியாகுமரி-தில்லி வரையிலான எனது பயணத்தை கடந்த 23 ஆம் தேதி தொடங்கினேன். பிரதமர் அலுவலகம் வரை பயணம் மேற்கொள்ள இருக்கிறேன்.

இதுவரை 16 மாநிலங்கள் வழியாக பயணித்துள்ளேன். 14 ஆயிரத்து 200 கி.மீ. தொலைவை சைக்கிளில் கடந்துள்ளேன்.

அடுத்தகட்டமாக அமெரிக்காவிலும் சைக்கிள் பயணம் மேற்கொள்ளத் திட்டமிட்டுள்ளேன் என்றார் அவர்.