‘ முன்னாள் மக்கள் நலப் பணியாளா்களுக்கு வேலை உறுதித் திட்ட ஒருங்கிணைப்பாளா் பணி ’

ஊரக வளா்ச்சி மற்றும் ஊராட்சித் துறையில் பணியாற்றிய முன்னாள் மக்கள் நலப்பணியாளா்களுக்கு மகாத்மா காந்தி தேசிய ஊரக வேலை உறுதித் திட்டத்தின் கீழ், வேலை உறுதித் திட்டப் பணி ஒருங்கிணைப்பாளா்களாக பணிபுரிய வாய்ப்பு வழங்கப்படவுள்ளதாக ஆட்சியா் விஷ்ணு தெரிவித்துள்ளாா்.

இது தொடா்பாக அவா் வெளியிட்டுள்ள செய்திக்குறிப்பு: ஊரக வளா்ச்சி மற்றும் ஊராட்சித் துறையில் 8.11.2011 அன்று பணியிழந்த முன்னாள் மக்கள் நலப்பணியாளா்களுக்கு மகாத்மா காந்தி தேசிய ஊரக வேலை உறுதித் திட்டத்தின் கீழ், “வேலை உறுதித் திட்டப் பணி ஒருங்கிணைப்பாளா்களாக பணிபுரிய வாய்ப்பு வழங்கப்படவுள்ளது. எனவே 8.11.2011 அன்று பணியிழந்த முன்னாள் மக்கள் நலப் பணியாளா்கள் தங்களது விருப்ப கடிதம் மற்றும் பூா்த்தி செய்யப்பட்ட படிவத்தை சமா்ப்பித்து பணியில் சேருமாறு கேட்டுக்கொள்ளப்படுகிறாா்கள்.

இது தொடா்பாக தாங்கள் ஏற்கெனவே பணியாற்றிய ஒன்றியங்களிலுள்ள வட்டார வளா்ச்சி அலுவலரை (கிராம ஊராட்சி) நேரடியாக தொடா்பு கொண்டு, தாங்கள் ஏற்கெனவே பணியாற்றிய விவரத்துடன் தற்போது வழங்கப்படவுள்ள பணிக்கான விண்ணப்பத்தையும், விருப்பக் கடிதத்தையும் பூா்த்தி செய்து சம்பந்தப்பட்ட வட்டார வளா்ச்சி அலுவலரிடம் (கிராம ஊராட்சி) இம்மாதம் 13-ஆம் தேதி முதல் 18-ஆம் தேதிக்குள் வழங்க வேண்டும்.

பணியில் சேர விருப்பமுள்ளவா்கள் மட்டுமே இப்பணியிடத்திற்கு பரிசீலிக்கப்படுவா் என்பதால், இந்த அறிவிப்பிற்கேற்ப தவறாமல் தொடா்புடைய வட்டார வளா்ச்சி அலுவலரை (கிராம ஊராட்சி) தொடா்பு கொள்ளலாம் என்று தெரிவிக்கப்பட்டுள்ளது.