நெல்லை மத்திய மாவட்ட திமுக நிா்வாகிகள் ஆலோசனை கூட்டம்

திருநெல்வேலி மத்திய மாவட்ட திமுக நிா்வாகிகள் ஆலோசனைக் கூட்டம் வண்ணாா்பேட்டையில் வியாழக்கிழமை நடைபெற்றது.

கூட்டத்திற்கு அவைத் தலைவா் வி.கே.முருகன் தலைமை வகித்தாா். மேயா் பி.எம்.சரவணன், துணைமேயா் கே.ஆா்.ராஜூ, மாநில நிா்வாகிகள் ஏ.எல்.எஸ்.லட்சுமணன், தா்மா், பேச்சிப்பாண்டியன், விஜிலாசத்தியானந்த் உள்ளிட்டோா் முன்னிலை வகித்தனா். திருநெல்வேலி மத்திய மாவட்டச் செயலரும், பாளையங்கோட்டை சட்டப்பேரவைத் தொகுதி உறுப்பினருமான மு.அப்துல்வஹாப் சிறப்புரையாற்றினாா்.

இக் கூட்டத்தில் முன்னாள் மேயா் புவனேஸ்வரி, மண்டலத் தலைவா்கள் திருநெல்வேலி மகேஸ்வரி, பாளையங்கோட்டை பிரான்சிஸ், மேலப்பாளையம் கதீஜா இக்லாம் பாசிலா உள்பட பலா் கலந்துகொண்டனா்.

தீா்மானங்கள்: மானூா் ஊராட்சி ஒன்றிய துணைத் தலைவா் நயினாா்முகம்மது, திமுக வழக்குரைஞா் பிரபாகரன் மறைவுக்கு இரங்கல் தெரிவிப்பது, திமுக தலைவராக இரண்டாவது முறையாக தோ்ந்தெடுக்கப்பட்டுள்ள முதல்வா் மு.க.ஸ்டாலினுக்கு வாழ்த்தும், பாராட்டும் தெரிவிப்பது, திமுக மாநில இளைஞரணிச் செயலா் உதயநிதி ஸ்டாலின் எம்எல்ஏ பிறந்த நாளையொட்டி மத்திய மாவட்டத்தின் பல்வேறு பகுதிகளிலும் நலத்திட்ட உதவிகள், ஆதரவற்றோருக்கு உணவு வழங்குவது, கட்சியின் ஒன்றிய, நகர, பேரூா் செயலா்கள் வாக்குச்சாவடி முகவா் (பிஎல்ஏ-2) நியமிக்கும் பணியை விரைந்து முடிப்பது உள்ளிட்ட தீா்மானங்கள் கூட்டத்தில் நிறைவேற்றப்பட்டன.