தூத்துக்குடியில் லாரி - சுமை ஆட்டோ மோதல்: ஆட்டோ ஓட்டுநர் சாவு

தூத்துக்குடியில் சனிக்கிழமை இரவு லாரி மீது சுமை ஆட்டோ மோதியதில் ஆட்டோ ஓட்டுநர் உயிரிழந்தார்.
 தூத்துக்குடி மாவட்டம், திருச்செந்தூர் அருகேயுள்ள பரமன்குறிச்சி கஸ்பா பகுதியைச் சேர்ந்த செந்தூர்பாண்டி மகன் சிவா (25).  சுமை ஆட்டோ ஓட்டுநர்.  தூத்துக்குடி புறவழிச்சாலையில் சனிக்கிழமை இரவு ஆட்டோவில் சரக்கு ஏற்றிக் கொண்டு  சென்று கொண்டிருந்தாராம்.  அப்போது, முன்னால் சென்ற லாரி திடீரென பிரேக் பிடித்ததால் ஆட்டோவை நிறுத்த முயன்றபோது எதிர்பாராதவிதமாக லாரி மீது ஆட்டோ மோதியது.  
இதில், காயமடைந்த சிவா மருத்துவமனைக்கு கொண்டுச் செல்லும் வழியில் உயிரிழந்தார்.  இந்த விபத்து குறித்து தென்பாகம் போலீஸார் வழக்குப் பதிந்து விசாரணை நடத்தி வருகின்றனர்.