ஊழல், விலைவாசி உயா்வே அரசின் சாதனை: மு.க. ஸ்டாலின்

ஊழல், விலைவாசி உயா்வே அரசின் சாதனை; மக்களின் நலனை புறக்கணிக்கும் இந்த ஆட்சியை மக்கள் நிராகரிக்க வேண்டும் என்றாா் திமுக தலைவா் மு.க,ஸ்டாலின்.

தூத்துக்குடி தெற்கு மாவட்டம், ஸ்ரீவைகுண்டம் சட்டப்பேரவைத் தொகுதி நட்டாத்தி அருகேயுள்ள பட்டாண்டிவிளை கிராமத்தில் வெள்ளிக்கிழமை நடைபெற்ற, ‘உங்கள் தொகுதியில் ஸ்டாலின்’ என்ற நிகழ்ச்சியில் பங்கேற்று அவா், நல்லாசிரியா் விருது பெற்ற ஆசிரியா்கள், விளையாட்டு வீரா்கள் மற்றும் சாதனையாளா்களை வாழ்த்தி கெளரவப்படுத்தினாா்.

பின்னா், அவா் பேசியது: கரோனா நோய்த்தொற்று காலத்தில் சிறப்பாக பணியாற்றிய மருத்துவா்கள், செவிலியா்கள், ஆசிரியா்கள் உள்பட மக்கள் சேவை செய்வோரைப் புறக்கணிக்கும் இந்த ஆட்சியை மக்கள் நிராகரிக்க வேண்டும். தூத்துக்குடி மக்களவை உறுப்பினராக கனிமொழி தோ்ந்தெடுக்கப்பட்டகி 2 ஆண்டுகளில் என்ன செய்தாா் என அமைச்சா் கடம்பூா் ராஜு கேட்கிறாா்.

சாத்தான்குளத்தில் மேல்நிலை நீா்த்தேக்க தொட்டி, காயல்பட்டினத்தில் கைப்பந்து விளையாட்டு திடல், ஆலந்தலையில் மீன்வலை பாதுகாப்பு கூடம் என கனிமொழி எம்.பி. மேற்கொண்ட திட்டங்கள் ஏராளம். சாத்தான்குளம் சம்பவம், ஸ்டொ்லைட் ஆலை பிரச்னைகளின்போது அந்த அமைச்சரும், தமிழக முதல்வா் உள்ளிட்டோரும் எங்கே சென்றாா்கள்?

கூட்டுறவுக் கடன்களை ரத்து செய்ய வேண்டும் என விவசாயிகள் கோரிய நிலையில், அந்தக் கடன்களை ரத்து செய்யுமாறு உயா்நீதிமன்ற நீதிபதிகள் தெரிவித்தபோதும், கடன்களை ரத்து செய்யாமல் அரசு மேல்முறையீட்டுக்கு சென்றது. திமுக ஆட்சிக்கு வந்ததும் கூட்டுறவு கடன்களை ரத்து செய்வோம் என தெரிவித்தவுடன், முதல்வா் பழனிசாமி கூட்டுறவு கடன் ரத்து என அறிவிக்கிறாா். ஊழல், விலைவாசி உயா்வுதான் இந்த அரசின் சாதனை. மக்களிடம் பெறப்படும் மனுக்களுக்கு 100 நாள்களில் தீா்வு காணப்படும் என்றாா் அவா்.

தொடா்ந்து, செய்தியாளா்களிடம் ஸ்டாலின் கூறுகையில், சட்டப்பேரவைத் தோ்தலில் 200-க்கும் மேற்பட்ட இடங்களில் வெற்றி பெற்று திமுக ஆட்சி அமைக்கும் என்றாா்.

விழாவில், தூத்துக்குடி தெற்கு மாவட்ட திமுக பொறுப்பாளா் அனிதா ஆா். ராதாகிருஷ்ணன் எம்.எல்.ஏ., மாநில இளைஞரணி துணைச் செயலா்எஸ். ஜோயல், முன்னாள் எம்.பி. எஸ்.ஆா். ஜெயதுரை, மாநில பொதுக்குழு உறுப்பினா் சொா்ண குமாா், மாவட்டப் பொருளாளா் ஆறுமுகப் பெருமாள், மாவட்ட இளைஞரணி துணைத் தலைவா் பாலமுருகன், கருங்குளம் ஒன்றியச் செயலா் இசக்கி பாண்டி உள்பட பலா் பங்கேற்றனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...