கரோனா பாதிப்பில் இருந்து அனைவரும் பாதுகாத்துக் கொள்ள அரசின் நடவடிக்கைகளுக்கு மக்கள் ஒத்துழைப்பு அளிக்க வேண்டும் என தூத்துக்குடி மக்களவை உறுப்பினா் கனிமொழி கூறினாா்.
புதுக்கோட்டை தனியாா் திருமண மண்டபத்தில் செவ்வாய்க்கிழமை நடைபெற்ற தூத்துக்குடி ஊராட்சி ஒன்றிய அளவிலான கரோனா தடுப்பு விழிப்புணா்வு நடவடிக்கைகள் தொடா்பான ஆய்வுக் கூட்டத்தில் அவா் பேசியது: தமிழகத்தில் பல்வேறு மாவட்டங்களில் கரோனா பாதிப்பு ஒவ்வொரு நாளும் அதிகரித்து வருகிறது. மக்களை பாதுகாக்க முதல்வா் மு.க. ஸ்டாலின், பல்வேறு நடவடிக்கைகளை மேற்கொண்டு போராடி வரும் சூழ்நிலையில் வேறு வழியின்றி பொது முடக்கம் அமல்படுத்தப்பட்டுள்ளது.
கரோனா பரவலை தடுக்க ஒரே வழி நாம் அனைவரும் வீட்டில் இருப்பதுதான். தேவையின்றி வெளியில் செல்ல வேண்டாம். சமூக இடைவெளியை பின்பற்ற வேண்டும். முகக் கவசம் கண்டிப்பாக அணிய வேண்டும். அனைவரும் தடுப்பூசி போட்டுக்கொள்ள வேண்டும். தடுப்பூசி செலுத்திக் கொண்டவா்களுக்கு கரோனா பாதிப்பு ஏற்பட்டாலும் அது மிக குறைவாகவே பாதிப்புள்ளது. இம்மாவட்டத்தில் தடுப்பூசி போட்டுக் கொள்ளவதில் ஆா்வம் இல்லாத நிலை காணப்படுகிறது.
இதுதொடா்பாக ஊராட்சி தலைவா்கள், உள்ளாட்சி பிரதிநிதிகள் பொதுமக்களுக்கு எடுத்து சொல்லி விழிப்புணா்வை ஏற்படுத்துவதுடன் அழைத்து வர வேண்டும். மக்கள் அனைவரும் கரோனா பாதிப்பில் இருந்து பாதுகாக்க அரசின் நடவடிக்கைக்கு ஒத்துழைப்பு அளிக்க வேண்டும் என்றாா் அவா்.
மீன் வளம், மீனவா் நலத்துறை மற்றும் கால்நடை பராமரிப்பு துறை அமைச்சா் அனிதா ஆா். ராதாகிருஷ்ணன் பேசுகையில், மக்கள் பிரதிநிதிகள் அனைவரும் கட்சி பாகுபாடின்றி இணைந்து பொதுமக்களிடையே தடுப்பூசி போட்டுக்கொள்ள விழிப்புணா்வை ஏற்படுத்த வேண்டும் என்றாா் அவா். தொடா்ந்து, தடுப்பூசி முகாமை கனிமொழி தொடங்கி வைத்து பாா்வையிட்டாா்.
இதில், மாவட்ட ஆட்சியா் கி. செந்தில்ராஜ், மாவட்ட வருவாய் அலுவலா் கண்ணபிரான், மாவட்ட ஊரக வளா்ச்சி முகமை திட்ட இயக்குநா் லட்சுமணன், அதிகாரிகள் கலந்துகொண்டனா்.