தூத்துக்குடி மாவட்டம் கோவில்பட்டியில் நடைபெற்று வரும் லட்சுமி அம்மாள் நினைவு கோப்பை காண 12ஆவது அகில இந்திய ஹாக்கி போட்டியின் 4ஆவது நாள் ஆட்டத்தில் தமிழ்நாடு காவல் துறை, புதுதில்லி பெட்ரோலியம் விளையாட்டு ஊக்குவிப்பு, புதுதில்லி கம்ப்ட்ரோலா் மற்றும் ஆடிட்டா் ஜெனரல் ஆப் இந்தியா அணிகள் வெற்றி பெற்றன.
ஞாயிற்றுக்கிழமை காலை நடைபெற்ற ஆட்டத்தில் சென்னை தமிழ்நாடு போலீஸ் அணி 3-2 என்ற கோல் கணக்கில் பெங்களூா் இந்திய விளையாட்டு மேம்பாட்டு ஆணைய அணியை தோற்கடித்தது. மாலையில் நடைபெற்ற முதல் ஆட்டத்தில் புது தில்லி பெட்ரோலியம் விளையாட்டு ஊக்குவிப்பு அணி 3-2 என்ற கோல் கணக்கில் சென்னை, மத்திய கலால் துறை அணியை தோற்கடித்தது. 2ஆவது ஆட்டத்தில் புதுதில்லி கம்ப்ட்ரோலா் மற்றும் ஆடிட்டா் ஜெனரல் ஆப் இந்தியா அணியும் தமிழ்நாடு விளையாட்டு மேம்பாட்டு ஆணைய அணியும் மோதின. இதில், 4-3 என்ற கோல் கணக்கில் புதுதில்லி அணி வெற்றி பெற்றது. 3ஆவது ஆட்டத்தில் செகந்திராபாத் தென் மத்திய ரயில்வே அணி, சென்னை இந்தியன் வங்கி அணியை 5-2 என்ற கோல் கணக்கில் வென்றது.
இன்றைய ஆட்டங்கள்: திங்கள் கிழமை காலை நடைபெறும் ஆட்டத்தில், பெங்களூா் ரயில் வீல் தொழிற்சாலை அணியும், ஒடிசா நிவாஸ் ஹாக்கி அணியும் மோதுகின்றன.
மாலை 5 மணிக்கு நடைபெறும் முதல் ஆட்டத்தில், சென்னை மத்திய கலால் துறை அணியும், சென்னை தமிழ்நாடு காவல்துறை அணியும் மோதுகின்றன. 2ஆவது ஆட்டத்தில், புது தில்லி பஞ்சாப் தேசிய வங்கி அணியும், சென்னை இந்தியன் ஓவா்சீஸ் வங்கி அணியும் மோதுகின்றன. 3ஆவது ஆட்டத்தில், பெங்களூா் கனரா வங்கி அணியும், புணே மத்திய கலால் துறை அணியும் மோதுகின்றன.