புதுக் கவிதைக்கு அச்சாரம் இட்டவா் பாரதிபாரதி பாஸ்கா் புகழாரம்

தூத்துக்குடி: புதுக் கவிதைக்கு அச்சாரம் இட்டவா் மகாகவி பாரதி என்று பட்டிமன்றப் பேச்சாளா் பாரதி பாஸ்கா் புகழாரம் சூட்டினாா்.

தாமிரவருணி தமிழ்வனம் நடத்திய வ.உ.சிதம்பரனாரின் 152 ஆவது பிறந்த நாள், மகாகவி பாரதியாா் 102 ஆவது நினைவுநாள் நிகழ்ச்சி தூத்துக்குடியில் உள்ள தனியாா் மண்டபத்தில் சனிக்கிழமை நடைபெற்றது. தாமிரவருணி தமிழ்வன தலைவா் ஏ.ஆா்.லட்சுமணன் வரவேற்றாா்.

நிகழ்ச்சியில் பெருங்குளம் செங்கோல் ஆதீனம் ஸ்ரீலஸ்ரீ சிவப்பிரகாச தேசிக சத்திய ஞான பரமாச்சாா்ய சுவாமிகள் தலைமை வகித்துப் பேசுகையில், ‘பெண்களுக்கு 33 சதவீத இடஒதுக்கீடு வழங்கப்பட்டதன் மூலம் பாரதி கண்ட கனவு நிறைவேறியிருக்கிறது. சமூகத்தில் தற்போது நிகழக்கூடிய ஒவ்வொரு செயல்பாடும் பாரதியின் கனவின்படியே நடந்து வருகின்றன’ என்றாா்.

பாரதியாா் எள்ளுப்பேரன் நிரஞ்சன் பாரதி பேசுகையில், காதல், சரித்திரம் எல்லாவற்றையும் தாண்டி கவிதையிலும் புதுமைகளைச் செய்துள்ளாா் பாரதி. கதை, கட்டுரை, சிறுகதைகளில் பல முற்போக்கு கருத்துகளை விதைத்துள்ளாா். அவரின் வாா்த்தைக்கும் வாழ்க்கைக்கும் வேறுபாடு கிடையாது என்றாா்.

வஉசியின் நாட்டுப் பற்றும் நற்றமிழ் உணா்வும் என்ற தலைப்பில் புலவா் ராமலிங்கம் பேசுகையில், கப்பலோட்டிய தமிழனாக நடித்தவரை நினைவில் வைத்திருக்கும் மக்கள், உண்மையான வரலாற்றாளா்களை மறந்துவிடுகின்றனா். தனது சொத்துகளை எல்லாம் தேசத்திற்காக இழந்தவா் வ.உ.சி. மனசாட்சிக்கு முக்கியத்துவம் கொடுத்து மாற்றத்தை ஏற்படுத்தியவா். சுதந்திரம் எனது பிறப்புரிமை அதை அடைந்தே தீருவோம் என்ற திலகரின் எண்ணத்தை நிறைவேற்றினாா். வ.உ.சி., பாரதி, சுப்ரமணிய சிவா ஆகியோா் ஆங்கிலேயா்கள் எவ்வளவு துன்புறுத்தியபோதிலும் தங்களது இயல்பிலிருந்து மாறவில்லை என்றாா்.

தனிப் பெருந்தலைவா் பாரதி என்ற தலைப்பில் பட்டிமன்ற பேச்சாளா் பாரதி பாஸ்கா் பேசியதாவது:

பாரதியின் வசனங்களில் இருந்துதான் புதுக் கவிதைகள் பிறந்தன. புதுக் கவிதைக்கு அச்சாரம் இட்டவா் பாரதி. மக்களவையில் பெண்களுக்கு 33 சதவீதம் இட ஒதுக்கீடு குறித்து பேசும்போது பாரதியின் கவிதைகள் எடுத்துரைக்கப்பட்டன. அவா் ஜாதி என்ற நெருப்பை சுட்டுப் பொசுக்க வந்தவா். அவா் வாழ்ந்த காலத்தில் தொழிற்சாலைகள் இல்லை என்றாலும் இரும்பைக் காய்ச்சி உருக்கிடுவேன் என்றாா். நூறு ஆண்டுகள் வாழ்ந்தாலும் எழுத முடியாத கவிதைகளை, 29 ஆண்டுகளிலேயே எழுதி இந்த தேசத்திற்கு விட்டுச் சென்றுள்ளாா். இந்த தேசத்தின் சிறப்பை பிள்ளைகளுக்கு சிறுவயதில் இருந்தே சொல்லிக் கொடுக்க வேண்டும் என்றாா்.

நிகழ்ச்சிக்கு தொழிலதிபா் டி.ஏ.வள்ளிநாயகம் முன்னிலை வகித்தாா்.

திருநெல்வேலி மாவட்ட முன்னாள் ஆட்சியா் மு.கருணாகரன் சிறப்பு அழைப்பாளராகப் பங்கேற்று பேச்சு, கட்டுரை போட்டிகளில் சிறப்பிடம் பெற்ற மாணவ, மாணவிகளுக்குப் பரிசுகளை வழங்கினாா்.

தொழிலதிபா்கள் எட்வின் சாமுவேல், விவேகம் ரமேஷ், காயத்ரி ஜெயக்குமாா், ஐஎன்டியூசி கதிா்வேல், பேராசிரியா் எம்.முருகலிங்கம், அபிராமி சந்திரசேகா், ரா. சொக்கலிங்கம், என்.மகாராஜன் உள்பட பலா் பங்கேற்றனா். மகாகவி பாரதியாா் இலக்கிய கழக தலைவா் வள்ளி முத்தையா நன்றி கூறினாா்.